Гідралагічны заказнік рэспубліканскага значэння “Глыбокае–Вялікае Астравіта” створаны ў Полацкім раёне Віцебскай вобласці ў 2007 г. шляхам аб’яднання раней існуючых ахоўных тэрыторый “Вялікае Астравіта” і “Глыбокае-Чарбамысла”. Мэтай заснавання стала зберажэнне аднайменных азёр, а таксама прылеглых да іх прыродных комплексаў на паўночным усходзе Полацкай нізіны.

Агульная плошча склала больш за 13 тыс. га. Рэльеф мясцовасці азёрна-ледавіковы, тэрыторыя амаль цалкам пакрыта хваёвым лесам з дамешкам ельнікаў і бярэзнікаў. Асаблівасцю заказніка з’яўляецца невялікая колькасць пустазелля. У прыбярэжнай паласе азёр растуць трыснёг, рагоз, шабельнік балотны, асака, сустракаецца ахоўны від – палушнік азёрны. У фаўне больш за 100 відаў пазваночных жывёл, у тым ліку рэдкія для Беларусі змеяед, сокал-кабец і трохпальцы дзяцел.

Заказнік з’яўляецца аб’ектам экалагічнага турызму. Тут абсталяваны экалагічная сцежка і месцы для адпачынку. У вызначаныя тэрміны дазволена паляванне і рыбалка.

Матэрыял падрыхтаваны ў 2023 г.