Гісторыя адкрытага акцыянернага таварыства “Жабінкаўскі камбікормавы завод” пачалася ў 1957 г., калі ў Жабінцы Брэсцкай вобласці побач з чыгункай на месцы цэнтралізаванага пункта прыёму збожжа “Загатзерне” (дзейнічаў з 1948 г.) быў уведзены ў эксплуатацыю малагабарытны ўніверсальны камбікормавы завод (МУК3-35). Прадпрыемства размалочвала і змешвала 35 тон розных відаў збожжа за суткі і забяспечвала камбікармамі гаспадаркі раёна.

У 1960-х гг. праведзена рэканструкцыя, пасля якой камбікормавы цэх завода выпускаў да 200 тон прадукцыі за суткі. У далейшым вялося паступовае ўдасканаленне вытворчасці: у 1971 г. быў устаноўлены гранулятар, што дазволіў вырабляць поўнарацыённы камбікорм з дабаўленнем вітамінаў і мікраэлементаў, у 1972 г. – пабудаваны склад сіласнага тыпу, уведзены лабараторны кантроль сыравіны і гатовай прадукцыі, у 1988 г. – поўнасцю аўтаматызаваны лініі дазіравання і змешвання кармоў. Асноўнымі спажыўцамі прадукцыі ў гэты перыяд з'яўляліся калгасы і саўгасы Брэсцкай вобласці.

У 1995 г. Жабінкаўскі камбікормавы завод пераўтвораны ў адкрытае акцыянернае таварыства. З мэтай удасканальвання вытворчасці быў пабудаваны элеватар, устаноўлены міні-млын і міні-пякарня, лініі лушчэння і затарвання, праведзена поўная аўтаматызацыя вытворчага працэсу. Уведзеныя ў эксплуатацыю лініі вадкіх энзімаў, экструдзіравання і экспандзіравання дазволілі ўдвая павялічыць пажыўную каштоўнасць камбікармоў, вырабляць іх у выглядзе крупкі і з рознымі дабаўкамі. У 2002 г. прадпрыемства арганізавала ўласную гандлёвую сетку магазінаў “Камбікармы”. Таксама ўпершыню ў краіне завод у 2006 г. асвоіў новы напрамак дзейнасці – выпуск сухога корму для хатніх жывёл (катоў, сабак, грызуноў). На прадпрыемстве пастаянна вядзецца праца па ўдасканаленні існуючых і стварэнні новых відаў кармоў. Найважнейшым звяном на заводзе з’яўляецца яго вытворча-тэхнічная лабараторыя, спецыялісты якой ажыццяўляюць кантроль якасці сыравіны і вырабленай прадукцыі, дакладнасць выканання тэхналагічнага працэсу.

У цяперашні час ААТ “Жабінкаўскі камбікормавы завод” – адно з найбуйнейшых спецыялізаваных прадпрыемстваў Беларусі па выпуску камбікармоў у складзе канцэрна “Брэстмясамалпрам”. Тут працуе больш за 500 чалавек. Асартымент выпускаемай прадукцыі прадстаўлены 51 відам камбікорма для ўсіх відаў сельскагаспадарчых і хатніх жывёл, рыб. Кармы экспартуюцца ў краіны СНД, Еўропы і Азіі. На балансе кампаніі знаходзіцца ўласны свінагадоўчы комплекс на 18 тыс. галоў і 50 фірменных магазінаў. Прадукцыя завода неаднаразова станавілася прызёрам конкурсаў “Лепшыя тавары Рэспублікі Беларусь” і “Лепшыя тавары Беларусі на рынку Расійскай Федэрацыі”, у 2021 г. прадпрыемства стала лаўрэатам Прэміі Урада Рэспублікі Беларусь за дасягненні ў галіне якасці.

Матэрыял падрыхтаваны ў 2025 г.