Гісторыя малочнага прадпрыемства ў Пружанах (Брэсцкая вобласць) пачалася са стварэння ў 1939 г. Раймаслапрама. У пасляваенны перыяд завод стаў самастойнай адзінкай, перапрацоўваў да 2 тыс. т малака штогод і вырабляў пастэрызаванае малако, масла, сыр, казеін і марожанае. У наступныя гады ў час рэканструкцыі прадпрыемства быў узведзены новы вытворчы корпус, запушчаны сыроробны цэх магутнасцю да 10 т за змену і ўчастак па вытворчасці сухога абястлушчанага малака. У 1998 г. завод акцыянаваны. Некаторы час уваходзіў у холдынг “Канцэрн Брэстмясамалпрам”.

У цяперашні час адкрытае акцыянернае таварыства “Пружанскі малочны камбінат” – высокатэхналагічнае прадпрыемства ў складзе холдынга “Аграпрамысловы холдынг Упраўлення справамі Прэзідэнта Рэспублікі Беларусь”. Тут працуе больш за 400 чалавек. На ім дзейнічаюць цэхі сухіх прадуктаў, вытворчасці масла і цэльнамалочнай прадукцыі, сыраробны. Магутнасць прадпрыемства складае больш за 10 тыс. т сыра, 2 тыс. т масла і 7 тыс. т сухіх малочных прадуктаў штогод. Прадпрыемства выпускае сыр, масла, тварог, тварожную пасту, сухія малочныя прадукты пад гандлёвымі маркамі “Шчодрыя Пружаны” і “Van Gold”. Прадукты кампаніі неаднаразова станавіліся пераможцамі конкурсаў “Лепшая прадукцыя года”, “Лепшы смак”, “Чэмпіён смаку”, “Прадукт года”, “Лепшыя тавары Рэспублікі Беларусь”, “Лідар спажывецкага рынку”, “Лідар года”, “Лепшы экспарцёр”. Прадпрыемства з’яўляецца лаўрэатам Прэміі Урада Рэспублікі Беларусь за дасягненні ў галіне якасці (2015, 2021).

Матэрыял падрыхтаваны ў 2024 г.