Выдатны хормайстар, адзін з заснавальнікаў Дзяржаўнага народнага хору БССР, нястомны збіральнік і добры знаўца беларускай народнай песні, заслужаны дзеяч мастацтваў БССР (1967) Канстанцін Іосіфавіч Паплаўскі нарадзіўся ў в. Сівіца Валожынскага раёна Мінскай вобласці ў сялянскай сям'і. Ён з дзяцінства захапляўся музыкай і з васьмі гадоў навучыўся іграць на розных інструментах. У 1937 г. паступіў у кансерваторыю г. Катавіцы (Польшча) на капельмайстарскі факультэт. Вучобу прыпыніла Другая сусветная вайна. Пасля яе заканчэння К.І. Паплаўскі некаторы час працаваў выкладчыкам музычнага вучылішча ў г. Маладзечна, з 1947 па 1952 г. кіраваў створаным ім дзіцячым хорам Беларускага радыё. Адначасова вучыўся ў Беларускай дзяржаўнай кансерваторыі. У 1951 г. скончыў дырыжорска-харавы факультэт, у 1952 г. гісторыка-тэарэтычны. У гэтым жа годзе разам з Г.І. Цітовічам стварыў Дзяржаўны акадэмічны народны хор БССР (зараз Нацыянальны акадэмічны народны хор Рэспублікі Беларусь імя Г.І. Цітовіча). Канцэртная дзейнасць гэтага калектыву на працягу дваццаці трох гадоў была звязана з імем К.І. Паплаўскага. Спачатку ён з'яўляўся галоўным хормайстрам, потым з 1958 г. музычным кіраўніком, у 1974–1975 гг. быў мастацкім кіраўніком. У рабоце імкнуўся да нацыянальнай самабытнасці гучання, вёў вялікую працу па збіранні і вывучэнні музычнага фальклору ў розных этнаграфічных раёнах Беларусі, запісаў шмат народных песень. На працягу пяці гадоў (1975–1980) К.І. Паплаўскі выкладаў у Беларускай кансерваторыі. З 1981 г. кіраваў Мінскім народным хорам Палаца культуры Беларускага рэспубліканскага савета прафесіянальных саюзаў.

Канстанцін Іосіфавіч Паплаўскі з'яўляецца аўтарам шэрагу твораў для аркестра народных інструментаў («Чэрвеньскія росы», «Канцэртная полька», «Палеская рапсодыя», «Беларускія напевы», «Фантазія на беларускія народныя тэмы», «Ронда», «Беларускія малюнкі»), фальклорна-ігравой кампазіцыі «Дажынкі» і інш. Асобае месца сярод твораў кампазітара займае драматычная балада на вершы А. Грачанікава «Міннае поле». У залаты фонд песеннага мастацтва нашай краіны ўвайшлі апрацоўкі беларускіх народных песень «Закаці, закаці ты, яснае сонейка», «Ой, павей, буйны вецярочак», «Туман, туман пры даліне», «Дзявочы карагод», «Зорка Венера», «Цераз сад-вінаград», «Калыханка» і іншыя, зробленыя К.І. Паплаўскім.

Матэрыял падрыхтаваны ў 2017 г.