Нарадзіўся беларускі вучоны ў в. Шаровічы Жыздрынскага раёна Калужскай вобласці (Расія) у сям'і сельскага служачага. У 1912 г. скончыў Маскоўскі сельскагаспадарчы інстытут. Ужо ў студэнцкія гады ў яго выявілася схільнасць да батанічнай навукі. У 1907–1908 гг. удзельнічаў у вялікай глебава-батанічнай экспедыцыі па абследаванні паўночнай часткі Іркуцкай губерні. У выніку непасрэднага знаёмства з флорай Сібіры ён напісаў і апублікаваў шэраг работ. Асабліва каштоўнай для вывучэння флоры Усходняй Сібіры з'яўлялася работа “Материалы по флоре Иркутской губернии”, дзе прыводзіцца спіс сабранага гербарнага матэрыялу па 491 віду. З 1913 па 1929 гг. выкладаў у сельскагаспадарчым інстытуце і ўніверсітэце г. Варонежа. Працуючы ў далейшым прафесарам Архангельскага лесатэхнічнага і Арэнбургскага сельскагаспадарчага інстытутаў, Міхаіл Пятровіч спалучаў выкладчыцкую дзейнасць з навукова-даследчай.

Уся наступная работа вучонага прысвечана галоўным чынам вывучэнню сістэматычнага складу лішайнікавай флоры СССР, пераважна глебавых лішайнікаў паўпустынных абласцей і лясной зоны еўрапейскай часткі СССР, Далёкага Усходу і Каўказа. У сваіх працах ён прыводзіць спісы глебавых лішайнікаў, знойдзеных у ваколіцах азёр Баскунчак, Эльтон, Цінакскае. Вучоным былі падрабязна вывучаны лішайнікі лясной паласы Еўрапейскай часткі СССР, апрацаваны шматлікія калекцыі лішайнікаў, што дасылаліся яму для вызначэння з многіх абласцей СССР.

У 1934 г. М.П. Тамін быў запрошаны на работу ў Цэнтральны батанічны сад АН БССР, дзе працаваў да 1941 г. і ў 1944–1950 гг. У Беларусі ім напісаны найбольш буйныя работы – “Определитель лишайников БССР. Ч. 1. Кустистые и листовые формы” (1936), “Определитель лишайников БССР и смежных областей РСФСР и УССР. Ч. 2. Накипные формы” (1938), дзе падведзены вынікі даных па відавым складзе і распаўсюджанні лішайнікаў у Беларусі і Расіі. У 1937 г. вучонаму было прысвоена званне доктара біялагічных навук, а ў 1940 г. ён выбраны членам-карэспандэнтам АН БССР. Працуючы загадчыкам аддзела флоры і гербарыя Інстытута біялогіі АН БССР (1951–1960), М.П. Тамін аб'яднаў калектыў батанікаў для стварэння пяцітомнай манаграфічнай працы “Флора БССР” і прыняў непасрэдны ўдзел у яе напісанні і рэдагаванні. Першы том быў падрыхтаваны да друку, але вайна перапыніла плённую навуковую дзейнасць вучонага. Толькі ў 1949 г. выйшаў першы том, апошні – у 1959 г. У гэты перыяд вучоны падрыхтаваў да друку “Определитель корковых лишайников Европейской части СССР (кроме Крайнего Севера и Крыма)” (1956), які з'яўляўся адным з нямногіх даступных дапаможнікаў для вызначэння лішайнікаў. Навуковыя працы М.П. Таміна ў галіне ліхеналогіі, сістэматыкі ніжэйшых раслін, батанічнай геаграфіі шырока вядомы ў свеце. Дзякуючы нястомнай дзейнасці, навуковаму аўтарытэту і шматлікім сувязям з замежнымі вучонымі М.П. Таміным быў створаны гербарый лішайнікаў, які ў “Агульным аддзеле” змяшчае больш за 8 тыс. экзэмпляраў. Ён апісаў 32 віды, 4 разнавіднасці і 12 формаў невядомых раней лішайнікаў. Імем вучонага названы 4 віды лішайнікаў. Міхаіл Пятровіч з'яўляецца аўтарам больш за 30 навуковых прац, у тым ліку 3 манаграфій. Сваёй навукова-даследчай працай вучоны зрабіў значны ўклад у развіццё навукі аб раслінах, якая набліжае нас да пазнання таямніц прыроды.

Матэрыял падрыхтаваны ў 2013 г.