Аляксандр Паўлавіч Вайтовіч нарадзіўся ў в. Рачкевічы Капыльскага раёна Мінскай вобласці ў сялянскай сям'і. У 1955 г. выдатна скончыў Цімкавіцкую сярэднюю школу і паступіў на фізічны факультэт Беларускага дзяржаўнага ўніверсітэта. З 1960 г. працаваў у Інстытуце фізікі АН БССР, дзе прайшоў шлях ад малодшага навуковага супрацоўніка да намесніка дырэктара. Пад кіраўніцтвам акадэміка М.А. Барысевіча актыўна працаваў у галіне лазернай фізікі: стварыў лабараторыю лазернай спектраскапіі, заснаваў навуковую школу. У 1968 г. абараніў кандыдацкую дысертацыю, у 1978 г. – доктарскую, на аснове якой у 1984 г. напісаў манаграфію «Магнитооптика газовых лазеров». З 1992 г. вучоны прымаў актыўны ўдзел у арганізацыі Інстытута малекулярнай і атамнай фізікі НАН Беларусі. З 1993 па 1997 г. Аляксандр Паўлавіч Вайтовіч узначальваў Інстытут малекулярнай і атамнай фізікі НАН Беларусі. З 1997 па 2000 г. з’яўляўся прэзідэнтам Нацыянальнай акадэміі навук Беларусі. У гэты час ініцыіраваў распрацоўку і вытворчасць у нашай краіне суперкамп'ютараў і праграмна-апаратных комплексаў на іх аснове і наладзіў супрацоўніцтва з расійскімі вучонымі. У выніку ў Беларусі з'явіўся шэраг суперкамп'ютараў, у тым ліку прадуктыўнасцю больш за мільярд аперацый у секунду, былі засвоены навейшыя інфармацыйныя тэхналогіі.

Са снежня 2000 г. па ліпень 2003 г. займаў пасаду старшыні Савета Рэспублікі Нацыянальнага сходу Рэспублікі Беларусь. У гэты ж перыяд працаваў галоўным рэдактарам часопіса «Даклады Нацыянальнай Акадэміі навук Беларусі». Сёння А.П. Вайтовіч загадвае лабараторыяй Інстытута фізікі імя Б.І. Сцяпанава Нацыянальнай акадэміі навук Беларусі.

Сфера навуковых інтарэсаў вучонага – лазерная фізіка, оптыка, дынаміка нелінейных сістэм, фізіка нанаразмерных структур. А.П. Вайтовіч – аўтар шэрагу манаграфій, навуковых артыкулаў, аўтарскіх пасведчанняў на вынаходніцтвы. У 1996 г. за цыкл работ «Явления анизотропии в лазерах и принципы поляризационной лазерной спектроскопии» удастоены Дзяржаўнай прэміі Рэспублікі Беларусь у галіне прыродазнаўчых навук, у 1999 г. атрымаў прэмію НАН Беларусі і Сібірскага аддзялення Расійскай АН імя акадэміка В.А. Капцюга за цыкл работ «Лазерная спектроскопия высокого разрешения и её фундаментальные приложения». Узнагароджаны ордэнамі «Знак Пашаны» (1981) і Францыска Скарыны (1998), медалём «За доблесную працу» (1970).

Матэрыял падрыхтаваны Капыльскай раённай цэнтральнай бібліятэкай імя А. Астрэйкі (Мінская вобласць) у 2013 г.