Емяльянаў Віктар Ніканавіч

Date of Birth: 12.12.1926 Украіна

Date of death: 12.05.1990 Мінск, г.

Quick reference: архітэктар, заслужаны архітэктар Беларусі, лаўрэат Дзяржаўнай прэміі СССР (1971)

Names in other languages: Емельянов Виктор Никонович (russian);

Архітэктар Віктар Ніканавіч Емяльянаў з’яўляўся адным з тых, хто ў другой палове ХХ ст. спрыяў пераўтварэнню сельскіх населеных пунктаў Беларусі ў добраўпарадкаваныя пасёлкі, якія незалежна ад іх велічыні, сталі вызначацца высокім узроўнем побытавага камфорту, інжынернага абсталявання, развітымі сістэмамі транспарту, сувязі і грамадскага абслугоўвання, спрыяльнымі ўмовамі для працы, інтэлектуальнага і фізічнага развіцця жыхароў.

Нарадзіўся В. Емяльянаў у Вінніцы (Украіна). Пасля заканчэння Маскоўскага архітэктурнага інстытута ў 1956 г. пераехаў у Мінск. Працаваў у Беларускім навукова-даследчым і праектным інстытуце па будаўніцтве на вёсцы (архітэктарам, старэйшым архітэктарам, кіраўніком групы, намеснікам галоўнага інжынера, у 1986–1989 гг. – галоўным архітэктарам). У складзе аўтарскіх калектываў інстытута рыхтаваў праекты планіроўкі і забудовы вёсак Аснежыцы Пінскага, Пліса Смалявіцкага, Сноў Нясвіжскага (усе 1968), Зашыр’е Ельскага (1970), Леніна Горацкага (1971), Мышкавічы Кіраўскага (1972), Крупіца Мінскага (1979) раёнаў. У 1971 г. за праект планіроўкі в. Верцялішкі Гродзенскага раёна (1969, у суаўтарстве) быў адзначаны Дзяржаўнай прэміяй СССР.

У 1963 г. В. Емяльянаў стаў членам Саюза архітэктараў СССР. У 1984 г. была выдадзена яго праца «Архитектурно-планировочная организация сельских населенных мест Белоруссии». Ён таксама з’яўляецца суаўтарам публікацый «Вертелишки. Белорусская ССР» (1974), «Планировка и застройка поселков аграрно-промышленного типа» і «Рекомендации по проектированию сельских населенных мест Белорусской ССР с учетом природных особенностей территории» (1978), «Рекомендации по территориальной организации личного подсобного хозяйства в сельских населенных пунктах различного типа» (1984).

Праца архітэктара была адзначана Ганаровай граматай Прэзідыума Вярхоўнага Савета БССР (1979), першай прэміяй на Усесаюзным конкурсе за лепшае рашэнне сельскіх пасёлкаў (1975), медалямі ВДНГ СССР. У 1985 г. В. Емяльянаву прысвоена ганаровае званне заслужанага архітэктара Беларусі.

Матэрыял падрыхтаваны ў 2026 г.