Красоўская Раіса Ермалаеўна

Date of Birth: 12.01.1935 Мінск, г.

Date of death: ?

Quick reference: артыстка балета, балетмайстар, рэжысёр-пастаноўшчык эстрадна-харэаграфічнага ансамбля "Чараўніцы", заслужаная артыстка Беларусі, лаўрэат прэміі Ленінскага камсамола Беларусі (1984)

Names in other languages: Красовская Раиса Ермолаевна (russian);

Раіса Ермалаеўна Красоўская нарадзілася ў Мінску Скончыўшы ў 1953 г. Беларускае харэаграфічнае вучылішча (педагог Н.Ф. Младзінская), працавала ў тэатрах оперы і балета Чэлябінска, Баку. З 1960 па 1975 г. была салісткай Дзяржаўнага тэатра оперы і балета БССР.

Раіса Красоўская – танцоўшчыца пераважна характарнага плана. Яе выкананне адметнае высакароднасцю пластычнай формы, вонкавай стрыманасцю пры ўнутраным тэмпераменце. Балерына стварыла выразныя вобразы ў спектаклях нацыянальнага рэпертуару (Марта і Цыганка ў балетах «Святло і цені» і «Пасля балю» Г. Вагнера, Мадэрнісцкая танцоўшчыца і Карчмарка ў «Мары» і «Выбранніцы» Я. Глебава). Выканала партыі феі Карабос («Спячая прыгажуня» П. Чайкоўскага), Мерсэдэс («Дон Кіхот» Л. Мінкуса), шмат характарных танцаў у балетных і оперных спектаклях, сярод якіх найбольш вылучаюцца «Панадэрас» у «Раймондзе» А. Глазунова, танцы егіпецкі і этрускі ў «Спартаку» А. Хачатурана, іспанскі ў «Лебядзіным возеры» П. Чайкоўскага, андалузскі ў «Папялушцы» С. Пракоф'ева, персідскі ў оперы «Хаваншчына» М. Мусаргскага. Арганічна адчувала сябе артыстка ў стыхіі маўрытана-іспанскага танца з балета «Балеро» М. Равеля.

З 1975 г. Р. Красоўская з'яўлялася нязменным кіраўніком, рэжысёрам-балетмайстрам мінскага народнага эстрадна-харэаграфічнага ансамбля «Чараўніцы» Дома культуры работнікаў гандлю, створанага ў 1974 г. (з 1989 г. ансамбль стаў прафесійным калектывам). Гэта быў самабытны ансамбль, аналагаў якому на тэрыторыі былога СССР не было. Эстрадныя нумары ствараліся пад музыку розных жанраў, у тым ліку класічную. Калектыў працаваў з такімі вядомымі выканаўцамі, як П. Бурчуладзэ і У. Співакоў. Ансамбль гастраляваў у многіх гарадах СССР, а таксама ў Венгрыі, ГДР, Іспаніі, Галандыі, Італіі, Аўстрыі, Партугаліі, на Канарскіх і Азорскіх астравах, выступаў з сімфанічным аркестрам на лепшых пляцоўках свету. У 1979 г. ансамбль «Чараўніцы» стаў лаўрэатам Усесаюзнага конкурсу артыстаў эстрады. Калектыў паспяхова супрацоўнічаў з беларускімі кампазітарамі Ю. Семянякам, І. Лучанком. Усесаюзная фірма «Мелодыя» выпусціла некалькі грампластынак з запісамі ансамбля.

Матэрыял падрыхтаваны ў 2011 г.