Іван Якаўлевіч Фяцісаў нарадзіўся ў Разанскай вобласці Расіі ў дружнай, працавітай сям’і. Пасля заканчэння школы-сямігодкі паступіў у Іванаўскае мастацкае вучылішча. У вольны час чытаў класічную літаратуру, наведваў тэатр і кіно. У 1940 г. будучага мастака прызвалі у Чырвоную Армію. У час Вялікай Айчыннай вайны Іван Фяцісаў стаў разведчыкам, удзельнічаў у Сталінградскай і Курскай бітвах, быў узнагароджаны ордэнамі Чырвонай Зоркі, Чырвонага Сцяга і Айчыннай вайны І ступені, медалямі.

Пасля дэмабілізацыі вярнуўся ў сваё вучылішча і скончыў яго у 1947 г. З гэтага года малады мастак пачаў працаваць у студыі выяўленчага мастацтва пры Доме народнай творчасці Брэста, прымаў удзел у мастацкіх выстаўках. Малады мастак аддаваў перавагу станковаму жывапісу, працаваў у жанрах сюжэтна-тэматычнай карціны, партрэта, нацюрморта, пейзажа. Партрэты, створаныя Фяцісавым, перадаюць характар чалавека, яго ўнутранае становішча, псіхалагічныя і сацыяльныя характарыстыкі: «Беларус» (1949), «Будаўніца» (1958), А.А. Ус (1959), даярка Н. Жук (1962), «Ганаровыя грамадзяне Брэста» (1978), серыі партрэтаў будаўнікоў Бярозаўскай ДРЭС (1960), ветэранаў Вялікай Айчыннай вайны (1958–1980). Ён аўтар шэрага лірычных пейзажаў, сюжэтна-тэматычных карцін «Юныя мічурынцы» (1952), «Салдацкія хваляванні ў Брэсцкай крэпасці ў 1905 г.» (1956), «Пераемнасць» (1970), «Памяць пра невядомыя магілы» (1977) і інш.

Іван Фяцісаў прымаў удзел у стварэнні экспазіцый Бярозаўскага гісторыка-краязнаўчага музея (1964–1965), Брэсцкага абласнога, Баранавіцкага і Столінскага краязнаўчых музеяў, Музея беларускага Палесся ў Пінску (1966–1970), музея касманаўтыкі на радзіме П.І. Клімука (1978), археалагічнага музея «Бярэсце», Камянецкай вежы. Разам з прафесарам А.Я. Асам мастак працаваў над стварэннем музея біялагічнага факультэта Брэсцкага педагагічнага інстытута імя А.С. Пушкіна (цяпер універсітэт).

З цягам часу Іван Фяцісаў стаў членам Беларускага саюза мастакоў (БСМ) і адным са стваральнікаў яго Брэсцкага аддзялення, у 1989 г. стаў заслужаным работнікам культуры Беларусі. Мастак шмат падарожнічаў па Беларусі і Расіі, яго персанальныя выставы праходзілі ў Брэсце і Мінску. Сёння творы Івана Фяцісава знаходзяцца ў музеях і карцінных галерэях Беларусі.

Даведка падрыхтавана ў 2020 г. на аснове матэрыялаў, змешчаных на сайце Брэсцкай цэнтральнай гарадской бібліятэкі імя А.С. Пушкіна.