Пакаташкін Валянцін Пятровіч

Date of Birth: 01.11.1940 Гомель, г.

Quick reference: мастак, педагог, заслужаны настаўнік Беларусі, выдатнік народнай адукацыі Беларусі, кавалер ордэна свяціцеля Кірылы Тураўскага Беларускай Праваслаўнай Царквы

Names in other languages: Pakatashkin Valyantsin Pyatrovitch (undetermined); Покаташкин Валентин Петрович (russian);

Валянцін Пятровіч Пакаташкін нарадзіўся ў Гомелі. З маленства захапляўся мастацтвам. Наведваў студыю выяўленчага мастацтва пры Доме культуры чыгуначнікаў. Сярод настаўнікаў былі такія выдатныя мастакі, як Б. Звінагродскі, В. Казачэнка. Скончыў Мінскае мастацкае вучылішча (1963), мастацка-графічны факультэт Віцебскага педагагічнага інстытута (1974). Вучыўся ў Н. Галоўчанкі, Т. Ігнаценкі, А. Шаўчэнкі. Ён стаў удзельнікам мастацкіх выставак з 1963 г., членам Беларускага саюза мастакоў з 1994 г.

Працуе В. Пакаташкін у станковым жывапісе. Яго творы адметныя лірызмам, стрыманасцю каларыту – “На поўначы далёкай” (1974), “Паўночная бухта” (1978), “Пасля вучэнняў”, “Лазенькі дымяць” (абодва 1980), “Нарач”, “Браслаўшчына”, “Зямля Палеская” (усе 1986), “Новае Палессе” (1993), “Навальніца адыходзіць”“Жыццё прадаўжаецца” (1996), “Ранняя вясна” (1997), “Музыка мора”, “Царква святога Міхаіла ў Мазыры” (абодва 2000), “Навальніца адыходзіць” (2001), “Шэры дзень” (2002), “Квітнеючы май” (2003), “Вечарэе” (2004), “Да вясны”, “Пасля навальніцы”, “Лес Чарнобыля” (усе 2006), “Бэз зацвіў” (2007) і інш.

Мастак шмат падарожнічаў па Беларусі, краінах былога Савецкага Саюза. Падчас гэтых вандровак уласны жыццёвы вопыт узбагачаўся ўражаннямі ад убачанага, пашыраўся яго творчы дыяпазон. З’яўляліся карціны з новай тэматыкай – індустрыяльныя і лірычныя пейзажы, напоўненыя філаcофскім падтэкстам, алегорыяй.

Шырокую вядомасць В. Пакаташкін набыў як кіраўнік студыі выяўленчага мастацтва пры Палацы піянераў Гомеля (1968–1997). Студыя атрымала назву народнай, але ў яе была іншая назва, усім вядомая – “студыя Пакаташкіна”. За плённую працу В. Пакаташкін атрымаў “званне заслужанага настаўніка Беларусі” (1980) і выдатніка народнай адукацыі. З 1997 г. працаваў намеснікам дырэктара Гомельскага мастацкага вучылішчы, актыўна ўдзельнічаў у рабоце Савета спецыяльнага фонду Прэзідэнта Рэспублікі Беларусь па падтрымцы таленавітай моладзі.

Творы В. Пакаташкіна знаходзяцца ў Гомельскім абласным краязнаўчым музеі, краязнаўчым музеі г. п. Урыцкае Гомельскай вобласці, прыватных калекцыях.

Матэрыял падрыхтаваны ў 2015 г.