Валерый Дайнэка нарадзіўся ў музыкальнай сям’і. Бацька хлопчыка меў спецыяльнасць харавога дырыжора, маці хораша спявала, старэйшы брат Генадзь вучыўся ігры на фартэпіяна. У 1959 г. Валерый паступіў у першы клас скрыпічнага аддзялення сярэдней спецыяльнай музычнай школы пры Беларускай дзяржаўнай кансерваторыі (цяпер Беларуская дзяржаўная акадэмія музыкі). Падлеткам ён захапіўся жывапісам, літаратурай, выступаў у групе “Менестрели” (1968–1971) у якасці вакаліста.

У 1970 г. Валерый Дайнэка быў прыняты на трэці курс Мінскага музычнага вучылішча імя М. Глінкі (цяпер Мінскі дзяржаўны музычны каледж імя М. Глінкі), дзе атрымаў спецыяльнасць саліста аркестра (скрыпка, альт). Падчас вучобы выступаў у ансамблях мінскіх клубаў, працаваў у складзе эстрадна-джазавага вакальнага квартэта аркестра Беларускага радыё пад кіраўніцтвам Б. Райскага. У 1972–1976 гг. малады музыкант быў удзельнікам ансамбля “Ровесник” пад кіраўніцтвам Б. Скугарэўскага і групы В. Бадзьярава пры Беларускай дзяржаўнай філармоніі. Непрацяглы час Валерый Дайнэка уваходзіў у склад ансамбля “Червона рута”, салісткай якога з’яўлялася Сафія Ратару. У складзе гэтага калектыву ён упершыню выступіў за мяжой.

У 1988 г. Валерый Дайнэка скончыў Мінскі інстытут культуры (цяпер Беларускі дзяржаўны ўніверсітэт культуры і мастацтваў) па класе харавога дырыжавання. З 1992 па 1997 г. з’яўляўся салістам Дзяржаўнага канцэртнага аркестра Беларусі (цяпер Нацыянальны акадэмічны аркестр сімфанічнай і эстраднай музыкі Рэспублікі Беларусь), у сярэдзіне 1990-х працаваў разам з Інай Афанасьевай і джаз-групай “Пятый угол”, рыхтаваў сольныя праекты.

Значная частка творчага жыцця артыста звязана з дзейнасцю вакальна-інструментальнага ансамбля “Песняры” пад кіраўніцтвам Уладзіміра Мулявіна. У 1977–1992 гг. Валерый Дайнэка з’яўляўся вакалістам, музыкантам і аранжыроўшчыкам знакамітага ансамбля, прымаў удзел у шматлікіх замежных гастролях па краінах Еўропы, Афрыкі і ЗША. Візітнай карткай артыста сталі песні “Беловежская пуща”, “Зачарованая мая”, “Послушайте”, “Калыханка”, “Я все тот же”. У залаты фонд музычнай спадчыны “Песняроў” увайшлі аранжыроўкі шэрагу песень, зробленыя В. Дайнэкам: “Ой, дзе ж мы хадзілі”, “А дзе была вуціца?”. У 1990 г. Валерыю Дайнэку было прысвоена ганаровае званне “Заслужаны артыст Беларускай ССР”.

З 1998 г. Валерый Дайнэка уваходзіць у склад ансамбля “Белорусские Песняры”. У рэпертуары калектыва аўтарскія творы і апрацоўкі беларускіх народных песень, творы сусветнай папулярнай класікі на беларускай, рускай і англійскай мовах.

У 1997–2005 гг. Валерый Сяргеевіч Дайнэка выкладаў эстрадны і джазавы вакал у Мінскім інстытуце сучасных ведаў, вёў тэлевізійную праграму “Воскресный вечер с Валерием Дайнеко”, запісваў сольныя альбомы. Сёння ў канцэртным рэпертуары Валерыя Дайнэкі творы сучасных беларускіх кампазітараў: І. Лучанка, Л.Захлеўнага, В. Мулявіна, А. Елісеенкава на словы беларускіх паэтаў.

Матэрыял падрыхтаваны ў 2011 г.