Беларускі цымбаліст Веньямін Антонавіч Бурковіч нарадзіўся 29 ліпеня 1937 г. у с. Усць-Коін Усць-Вымскага раёна Рэспублікі Комі (Расія). Свой творчы шлях пачаў у 1952 г. артыстам, з 1957 г. салістам, а пазней канцэртмайстрам Дзяржаўнага народнага аркестра БССР. Вучыўся ў Беларускай кансерваторыі (цяпер Беларуская дзяржаўная акадэмія музыкі), якую скончыў у 1962 г. Пасля вучобы творчая дзейнасць В.А. Бурковіча на працягу ўсяго жыцця была звязана з Беларускай дзяржаўнай філармоніяй. Для выканаўчай манеры цымбаліста былі характэрны віртуозная тэхніка, тэмперамент, багатая нюансіроўка, артыстызм. У рэпертуары прысутнічалі не толькі арыгінальныя творы беларускіх кампазітараў, але і пералажэнні п'ес кампазітараў-класікаў. Музыкант шмат гастраляваў па Савецкім Саюзе і замежжы, выступаў з канцэртамі ў Венгрыі, Балгарыі, Польшчы, Чэхаславакіі, Нарвегіі, Фінляндыі, Францыі, Швецыі, Канадзе і інш. У 1957 г. Веньямін Антонавіч стаў лаўрэатам конкурсаў Усесаюзнага і VI Сусветнага фестываляў моладзі і студэнтаў, якія праходзілі ў Маскве. У 1967 г. атрымаў званне заслужанага артыста Беларусі.

Матэрыял падрыхтаваны ў 2012 г.