Уявіць сёння беларускую эстраду без народнага артыста Беларусі, заснавальніка і кіраўніка беларускага эстраднага ансамбля “Сябры” А.І. Ярмоленкі немагчыма. Выдатнага спевака і яго калектыў ведаюць даўно і далёка за межамі нашай краіны.

Нарадзіўся Анатоль Іванавіч на Украіне, у г. Казацін Вінніцкай вобласці. У час службы ў арміі трапіў у ансамбль песні і танца Бакінскай вайскавой акругі проціпаветранай абароны. Менавіта гэты ансамбль стаў для спевака трамплінам у будучае. Музычную адукацыю А. Ярмоленка атрымаў у Гомельскім музычным вучылішчы, якое закончыў у 1976 г., але творчую прафесійную дзейнасць пачаў у 1969 г. у гомельскай філармоніі, дзе быў мастацкім кіраўніком і салістам вакальна-інструментальных ансамбляў “Сувенір” (1969–1971) і “Песні над Сожам” (1971–1973). У 1973 г. А. Ярмоленка стварыў з выпускнікоў гомельскага музычнага вучылішча вакальна-інструментальны ансамбль “Сябры”, а ў 1974 г. ансамбль і А. Ярмоленка як яго саліст сталі дыпламантамі беларускага конкурсу артыстаў эстрады ў Мінску. З гэтага часу калектыў ансамбля неаднаразова станавіўся лаўрэатам самых розных конкурсаў. Многія песні, выкананыя А. Ярмоленкам, сталі шлягерамі (“Алеся”, “Лягу-прылягу”, “Завалінка”, “Гуляць, дык гуляць” і інш.). Гэтаму спрыялі багаты па тэмбральнай афарбоўцы голас спевака, уласцівая яго выкананню яркая індывідуальнасць. А. Ярмоленка стаў першым выканаўцам многіх папулярных песень беларускіх і расійскіх кампазітараў – А. Іванова, І. Лучанка, М. Сацуры, Э. Ханка і інш. З’яўляючыся больш за трыццаць год мастацкім кіраўніком легендарнага ансамбля “Сябры”, ён разам з калектывам выступаў на самых знакамітых пляцоўках былога СССР і СНД, неаднаразова даваў канцэрты ў ЗША, Лацінскай Амерыцы, Індыі, Польшчы, Германіі, Фінляндыі, гастраляваў у краінах Азіі, Афрыкі. У 1985 г. выступаў перад абмежаваным кантынгентам савецкіх войск у Афганістане. А. Ярмоленка – лаўрэат прэміі Ленінскага камсамола Беларусі (1984). За заслугі ў развіцці і прапагандзе беларускага музычнага мастацтва, высокае выканаўчае майстэрства А. Ярмоленку было прысвоена ганаровае званне народнага артыста Беларусі (1993). Ён удастоены дзяржаўнай узнагароды – ордэна Францыска Скарыны (2006). У гонар славутага спевака і яго ансамбля 19 студзеня 2006 г. у Маскве, на Плошчы зорак, каля будынка Дзяржаўнай цэнтральнай канцэртнай залы “Расія” быў закладзены памятны знак. Гэта падзея стала заслужаным прызнаннем усёй беларускай песеннай культуры. У верасні 2007 г. А. Ярмоленка атрымаў ганаровае званне “Мінчанін года”.

Матэрыял падрыхтаваны ў 2007 г.