Аляксандр Казімір Сапега нарадзіўся ў родавым маёнтку Мацееў на Валыні ў сям’і Фрыдэрыка, падкаморыя ўладзімірскага, і Евы са Скашэўскіх. Вучыўся ў езуіцкім калегіуме ў Любліне і Віленскай езуіцкай акадэміі. Пасля заканчэння класа паэзіі ў Калегіуме Навадворскага ў Кракаве (1638) паступіў у Кракаўскі ўніверсітэт. У далейшым вывучаў кананічнае права ва ўніверсітэтах Падуі, Балонні, Рыме, Парыжы (1647–1649).

Адначасова з атрыманнем адукацыі А. К. Сапега паступіў на дзяржаўную службу. З 1647 г. выконваў абавязкі каралеўскага сакратара, у 1657–1659 гг. – рэферэндара духоўнага Вялікага Княства Літоўскага, удзельнічаў у працы сеймікаў, Рады Сената, ваенна-фінансавай камісіі ў Вільні, палітычных перагаворах і інш. Займаў таксама шэраг духоўных пасад: віленскі канонік з 1649 г. і прэпазіт з 1650 г., канонік варшаўскі з 1651 г., суфраган віленскі з 1655 г., біскуп жамойцкі (1659–1667) і віленскі з 1667 г. Удзельнічаў у пасяджэннях капітулы, уваходзіў у біскупскі суд. Аляксандр Казімір заклаў брацтва імя Дзевы Марыі пры віленскай катэдры, фундаваў яе аздабленне, пашырэнне віленскай семінарыі, будаўніцтва касцёлаў і капліц, маста праз Вілію і інш.

Памёр Аляксандр Казімір у 1671 г., пахаваны ў касцёле Святога Станіслава ў Вільні.

Матэрыял падрыхтаваны ў 2023 г.