Радзівіл Міхал Казімір, сын Аляксандра Людвіка

Date of Birth: 26.10.1635 Нясвіж, г., Мінская вобласць

Date of death: 14.11.1680

Quick reference: ваенны і дзяржаўны дзеяч ВКЛ, удзельнік вайны Расіі з Рэччу Паспалітай 1654–1667 гг.

Names in other languages: Radziwiłł Michał Kazimierz (polish); Радзивилл Михаил Казимир (russian);

Міхал Казімір Радзівіл нарадзіўся ў Нясвіжы і паходзіў з роду Радзівілаў герба «Трубы», сын Аляксандра Людвіка, маршалка вялікага літоўскага, і Тэклі Ганны з Валовічаў. Пасля смерці маці выхоўваўся ў Кобрыне пад апекай бабулі Альжбеты. Адукацыю атрымаў у Нясвіжы. Удзел у грамадскім жыцці пачаў у 1648 г., калі на элекцыйным сейме ў Варшаве аддаў свой голас за караля і вялікага князя Яна Казіміра. У 1649‒1652 гг. жыў у Бялай і ў Нясвіжы. У 1652 г. атрымаў тытул стольніка літоўскага. Разам з бацькам падарожнічаў па Еўропе, затым вучыўся ў Балонскім універсітэце. У 1654 г. актрымаў у спадчыну Нясвіжскую ардынацыю і іншыя ўладанні. На працягу сваёй грамадскай дзейнасці М. К. Радзівіл займаўся ўмацаваннем Нясвіжа і замка, рабіў значныя ахвяраванні для павышэння бяспекі і абароназдольнасці горада, а таксама касцёлам і кляштарам. У час вайны Расіі з Рэччу Паспалітай (1654‒1667) разам з жыхарамі абараняў Нясвіж. У чыне палкоўніка ўдзельнічаў у бітвах са шведамі ў Польшчы ў 1656 г. і Курляндыі ў 1659 г. У 1660 г. прымаў удзел у бітвах за вызваленне захопленых маскоўскімі войскамі тэрыторый. У 1662 г. атрымаў булаву гетмана літоўскага. У сувязі з ваеннымі спусташэннямі дамогся ад караля Рэчы Паспалітай вызвалення Нясвіжа на чатыры гады ад падаткаў. 20 студзеня 1673 г. выдаў «Універсал», у якім заахвочваў насельніцтва сяліцца ў горадзе. У час вайны з Турцыяй удзельнічаў у Хацінскай бітве (1673). На сейме 1674 г. падтрымаў кандыдатуру Яна III Сабескага на прастол і ў далейшым быў яго паплечнікам. У 1679 г. накіраваны з дыпламатычнай місіяй у Вену, Венецыю і Ватыкан да імператара Леапольда I і Папы Рымскага Інакенція XI. Памёр на зваротным шляху ў Балонні. Міхал Казімір Радзівіл быў ардынатам нясвіжскім (1654) і алыцкім (1667). Выбіраўся паслом на сеймы 1648, 1659, 1661 гг. У 1664 г. з’яўляўся маршалкам Галоўнага Трыбунала Вялікага Княства Літоўскага.

У шлюбе з Кацярынай з роду Сабескіх меў дачку Тэклю Адэлаіду і сыноў Мікалая Францішка, Багуслава Крыштафа, Яна, Людвіка, Юрыя Юзафа, Караля Станіслава.

Матэрыял падрыхтаваны ў 2025 г.