Адным з тых, хто ўнёс значны ўклад у развіццё народнай адукацыі на Віцебшчыне ў пачатку ХХ ст. быў Клаўдзій Іванавіч Ціхаміраў.

Нарадзіўся будучы педагог у сям’і святара ў в. Славіхіна Старарускага павета Наўгародскай губерні. Скончыў Наўгародскую духоўную семінарыю, у далейшым вучыўся на гістарычным аддзяленні Санкт-Пецярбургскай духоўнай акадэміі. Пасля заканчэння навучання (1890) працаваў настаўнікам прыватнай жаночай гімназіі. З 1895 г. быў інспектарам народных вучылішч Магілёўскай губерні, дырэктарам настаўніцкіх семінарый у Свіслачы і Полацку.

З 1910 г. К.І. Ціхаміраў займаўся арганізацыяй і падрыхтоўкай да адкрыцця Віцебскага настаўніцкага інстытута і на працягу васьмі гадоў выконваў абавязкі яго дырэктара. Першакласны педагог, буйны спецыяліст у галіне рускай славеснасці, псіхалогіі і педагогікі, Клаўдзій Іванавіч у сваёй педагагічнай дзейнасці выступаў за пашырэнне зместу адукацыі, удасканаленне выкладання, распаўсюджванне пісьменнасці, увядзенне ўсеагульнай пачатковай адукацыі. Педагог стаў аўтарам метадычных дапаможнікаў і артыкулаў: “Обучение грамоте” (1901), “Важнейшие выводы изучения памяти” (1905), “Психологические основы обучения” (1912) і інш. У 1920–1924 гг. К.І. Ціхаміраў працаваў рэктарам Віцебскага практычнага сельскагаспадарчага інстытута, выкладаў педагогіку і псіхалогію з элементамі логікі.

Акрамя педагагічнай дзейнасці Клаўдзій Іванавіч прымаў актыўны ўдзел у грамадскім жыцці. З 1910 г. быў членам Віцебскай вучонай архіўнай камісіі, старшынёй яе рэдакцыйнага камітэта і праўлення (1912). Пад яго рэдакцыяй былі надрукаваны два тамы зборніка камісіі “Полацка-Віцебская даўніна”, пры непасрэдным удзеле К.І. Ціхамірава ў Віцебску быў пастаўлены помнік героям Айчыннай вайны 1812 г., адкрыты філіял Маскоўскага археалагічнага інстытута (1911).

Матэрыял падрыхтаваны ў 2017 г.