Даследчык развіцця сельскай гаспадаркі Беларусі, першы доктар гістарычных навук у гісторыі Беларускай дзяржаўнай сельскагаспадарчай акадэміі Мікалай Аляксандравіч Шытаў нарадзіўся ў в. Яляхіна (Валагодская вобласць, Расія) у сялянскай сям’і. Пасля заканчэння сярэдняй школы ў 1940 г. служыў у арміі. У час Вялікай Айчыннай вайны праходзіў навучанне ў школе пілотаў і авіямеханікаў, з 1943 г. – у якасці авіямеханіка 142-й авіяцыйнай дывізіі знаходзіўся на фронце. Пасля дэмабілізацыі ў 1946 г. паступіў на гістарычны факультэт Чарапавецкага настаўніцкага інстытута, у далейшым працаваў выкладчыкам, скончыў завочна Ленінградскі дзяржаўны педагагічны інстытут імя Герцэна (1952).

З 1953 г. М. А. Шытаў працаваў у Беларускай дзяржаўнай сельскагаспадарчай акадэміі. Быў выкладчыкам асноў марксізма-ленінізма, адначасова вёў навукова-даследчую работу. У 1959 г. абараніў дысертацыю на ступень кандыдата гістарычных навук на тэму «Деятельность партийных организаций Белоруссии по повышению уровня механизации колхозного производства в годы борьбы за крутой подъем сельского хозяйства». У 1963 г. вучоны ўзначаліў кафедру гісторыі КПСС. Дзякуючы яго шырокім рознабаковым ведам, педагагічнаму майстэрству і бездакорным адносінам да службовых абавязкаў на кафедры панавала атмасфера сапраўднай павагі і даверу. Пад кіраўніцтвам Мікалая Аляксандравіча калектыў кафедры падрыхтаваў нарыс гісторыі ўстановы – «Белорусская ордена Трудового Красного Знамени сельскохозяйственная академия: 125 лет: очерки истории» (1965). Вынікам далейшых даследаванняў вучонага стала абароненая ў 1973 г. дысертацыя на саісканне ступені доктара гістарычных навук на тэму «Деятельность Коммунистической партии Белоруссии по организационно-хозяйственному укреплению и развитию колхозов (1953–1961 гг.)». Сярод іншых публікацый – навуковыя працы, прысвечаныя дзейнасці Камуністычнай партыі Беларусі па развіцці сельскай гаспадаркі, методыцы выкладання грамадскіх дысцыплін у вышэйшых навучальных установах: «Коммунистическая партия – организатор массового колхозного движения в стране» (1958), «В борьбе за укрепление и развитие колхозов: 1953–1961 гг.» (1971), «Белорусская сельскохозяйственная академия: 150 лет: краткий очерк истории и деятельности» (1990, у суаўтарстве) і інш.

За высокія дасягненні ў педагагічнай і навуковай дзейнасці М. А. Шытаў быў узнагароджаны ордэнам Працоўнага Чырвонага Сцяга (1971), медалямі і граматамі. У 1977 г. яму прысвоена ганаровае званне «Заслужаны работнік вышэйшай школы БССР».

Матэрыял падрыхтаваны ў 2021 г.