Астрожская друкарня – адзін са старэйшых цэнтраў кнігадрукавання ў Вялікім Княстве Літоўскім (ВКЛ) – была заснавана маскоўскім першадрукаром Іванам Фёдаравым па ініцыятыве і на сродкі магната Канстанціна Канстанцінавіча Астрожскага, маршалка валынскай зямлі, старосты ўладзімірскага і ваяводы кіеўскага. Праціўнік заключэння Люблінскай уніі 1569 г., ён выступаў супраць пашырэння каталіцтва на беларускіх і украінскіх землях. Князь разумеў, што захаванне праваслаўнай веры немагчыма без павышэння адукацыі насельніцтва і ў першую чаргу духавенства. Канстанцін Астрожскі падтрымліваў праваслаўныя брацтвы, заснаваў школы ў Слуцку, Тураве, Уладзіміры-Валынскім і Львове. Пад яго апекай у маёнтку Астрог (цяпер Ровенская вобласць) пачалі дзейнічаць першая на Украіне славянска-грэка-лацінская калегія (сярод сучаснікаў вядома пад назвай «акадэмія») і друкарня, дзе пад кіраўніцтвам І. Фёдарава рыхтаваліся і друкаваліся вучэбная, навучальная і царкоўная літаратура. Сярод найбольш вядомых выданняў – «Азбука», якая мела дадатак – грэчаскі алфавіт і грэка-славянскія тэксты, а таксама «Сказанне» чарнарызца Храбра (1578); «Псалтыр і Новы запавет» з алфавітна-прадметным паказальнікам да яго «Кнігазбор рэчаў самых патрэбных» (1580). У 1581 г. у друкарні выдалі першую ва Усходняй Еўропе поўную славянскую Біблію кірылічнага шрыфту (так званая Астрожская Біблія). Гэта быў лепшы для таго часу варыянт перакладу біблейскіх тэкстаў на царкоўнаславянскую мову. У яе падрыхтоўцы і рэдагаванні прымаў удзел К.К. Астрожскі. Ён прыклаў велізарныя намаганні для таго, каб зрабіць тэкст агульнадаступным, захоўваючы пры гэтым максімальную набліжанасць да арыгінала. Да нашых дзён дайшло больш за 260 экзэмпляраў Астрожскай Бібліі, якія захоўваюцца ў музеях, бібліятэках, архівах Беларусі, Расіі, Украіны, Польшчы, Літвы, Румыніі, Грэцыі, Ватыкана і іншых краін. Пры друкаванні кніг выдаўцы перанялі вопыт работы Ф. Скарыны, які выкарыстоўвалі ў тэксце і аздабленні. Значная роля ў дзейнасці друкарні належыла Г. Івановічу, які рабіў шрыфты і займаўся мастацкім афармленнем выданняў. Пасля ад'езду І. Фёдарава (1581) у працы друкарні наступіў перапынак да 1594 г., пасля чаго яна дзейнічала да 1612 г. За гэты час было выдадзена 12 кніг, сярод якіх навучальныя дапаможнікі, богаслужэбныя і палемічныя творы, у тым ліку «Лісты патрыярха Іераміі» і «Дыялог патрыярха Генадзія» (1583), славуты палемічны трактат пісьменніка і святара В. Суражскага «Аб адзінай сапраўднай і праваслаўнай веры і святой апостальскай царкве» (1588), «Кніга пра пост» з павучэннямі Васіля Вялікага (1594), «Маргарыт» (1595) – збор казанняў Іаана Златавуста і інш.

Матэрыял падрыхтаваны ў 2018 г.