Мінскі абласны тэатр лялек «Батлейка» створаны ў 1990 г. Выбар назвы сведчыць аб імкненні тэатра арыентавацца на старажытныя традыцыі беларускага мастацтва, хрысціянскую духоўнасць, агульначалавечыя каштоўнасці і мараль. Адкрыццё адбылося 27 снежня 1990 г. прэм’ерай спектакля «Прывітанне мартышцы» Р. Осцера. У рэпертуары – спектаклі для гледачоў шырокага ўзроставага дыяпазону (як для самых маленькіх, так і для сямейнага прагляду). Рэпертуар фарміраваўся на аснове дзіцячай і дарослай, класічнай і сучаснай нацыянальнай драматургіі. Шэраг спектакляў выкананы ў асаблівай аўтарскай стылістыцы беларускіх мастакоў з выкарыстаннем арыгінальных народных сродкаў выразнасці. У пастаноўках задзейнічаны лялькі розных сістэм – трасцінкавыя, пальчаткавыя, планшэтныя, батлеечныя, шпяньковыя, марыянеткі. Практыкуюцца прыёмы традыцыйнага лялечнага шырмавага тэатра і адкрытага лялькаваджэння ў спалучэнні з работай акцёра ў жывым плане.

На сцэне тэатра здзейснены шматлікія пастаноўкі паводле твораў беларускіх драматургаў – «Хохлік», «Піліпка і Ведзьма», «Певень, Кот, Цмок і іншыя» С. Кавалёва; «Страшнік Гам», «Новы калабок» П. Васючэнкі; «Меч Анёла» (батлеечныя варыяцыі), «Тры парсючкі» І. Сідарука і інш. Таксама ставіліся пастаноўкі паводле казак «Салавей», «Снежная каралева» Х. К. Андэрсена; «Храбры партняжка» братоў Грым; «Канёк-Гарбунок» П. Яршова і інш. Улічваючы духоўныя і сацыяльныя патрэбы гледача, з’явіліся спектаклі на рускай мове – гэта драматургія, у аснове якой – аўтарскія (класічныя) і народныя казкі. Вялікае значэнне ў падборы рэпертуару тэатр надае самабытнасці і арыгінальнасці пастановак, не губляючы свайго брэнда «Батлейка». Асобныя спектаклі ставілі рэжысёры Ю. Сарычаў («Доктар Айбаліт» В. Карастылёва паводле К. Чукоўскага), Д. Нуянзін («Маша і мядзведзь» В. Швембергара), А. Ляляўскі («Пакінуты ўсімі» паводле казкі Х. К. Андэрсена «Брыдкае качанё»), У. Грамовіч («Тыграня Петрык» Х. Янушэўскай), У. Уладыка («Яна і я» паводле Я. Купалы), М. Андрэеў («Казка пра Ямелю» А. Тарахоўскай, «Васіліса Прыгажуня» К. Чарняк, «Казка пра цара Салтана» паводле А. Пушкіна, «Цудоўная дудка» В. Вольскага, «Церамок» С. Маршака), А. Плютава («Залатая табакерка»), А. Турчыновіч («Дзюймовачка» паводле казкі Х. К. Андэрсена), А. Янушкевіч («Кавалачкі па закавулачках» Р. Осцера).

За гады творчай дзейнасці калектыў прымаў удзел у міжнародных фестывалях тэатраў лялек у Расіі, Украіне, Беларусі, Сербіі, Чарнагорыі, Малдове, Польшчы, Германіі і Італіі. Мінскі абласны тэатр лялек «Батлейка» працуе ў цеснай садружнасці з Міжнародным саюзам дзеячаў тэатра лялек (UNIMA).

Матэрыял падрыхтаваны ў 2016 годдзе.