Паўвека назад пачалася гісторыя флагмана беларускай мікраэлектронікі ААТ «ІНТЭГРАЛ»: у 1963 г. на карце Мінска з’явілася новае буйное прадпрыемства – Завод паўправадніковых прыбораў імя Ф.Э. Дзяржынскага. Дыёды, транзістары і інтэгральныя мікрасхемы новага прадпрыемства карысталіся ў СССР вялікім попытам. У 1971 г. на базе завода імя Ф.Э. Дзяржынскага было створана навукова-вытворчае аб’яднанне «ІНТЭГРАЛ» (НВА «ІНТЭГРАЛ»), куды ўвайшлі заводы «Элмаш» (Маладзечна), «Транзістар» (Мінск), навукова-тэхнічны цэнтр «Белмікрасістэмы» (цяпер Дызайн-цэнтр ААТ «ІНТЭГРАЛ»). Пазней да НВА «ІНТЭГРАЛ» былі далучаны заводы «Электроніка» (Мінск), «Камертон» (Пінск), «Цветотрон» (Брэст) і спецыяльныя канструктарскія бюро «Захад» (Брэст) і «Няміга» (Мінск). У 1980-я гг. на вытворчых плошчах НВА «ІНТЭГРАЛ» выраблялася каля 40% мікраэлектроннай прадукцыі для патрэб абарончай прамысловасці СССР, вялікую частку якой складала апаратура для вывучэння касмічнай прасторы. Высокая якасць і надзейнасць вырабаў былі адзначаны ордэнам Кастрычніцкай Рэвалюцыі (1974) і ордэнам Леніна (1981).

У выніку распаду СССР «ІНТЭГРАЛ» страціў вялікі рынак збыту прадукцыі. У гэтых нялёгкіх умовах калектыў прадпрыемства здолеў захаваць вытворчыя магчымасці, пашырыў наменклатуру мікраэлектроннай прадукцыі, наладзіў сувязі з партнёрамі з Расіі, Індыі, Кітая.

У 2010 г. НВА «ІНТЭГРАЛ» было рэарганізавана ў адкрытае акцыянернае таварыства «ІНТЭГРАЛ». Сёння ў склад ААТ «ІНТЭГРАЛ» уваходзяць філіялы ў Мінску: Завод паўправадніковых прыбораў, «Транзістар», НТЦ «Белмікрасістэмы» і філіял у Пінску – Завод «Камертон». Сёння на прадпрыемстве рэалізуецца шэраг навукова-тэхнічных праграм Саюзнай дзяржавы – «Аснова», «Саюзны цеплавізар», «Скіф», «Космас-НТ» і інш. Прадукцыя беларускага прадпрыемства пастаўляецца ў 27 краін свету, але буйнейшым спажыўцом інтэгральных мікрасхем і дыскрэтных паўправадніковых прыбораў застаецца Расія.

Сёння ААТ «ІНТЭГРАЛ» – буйнейшы навукова-вытворчы комплекс па вытворчасці электроннай кампанентнай базы – інтэгральных мікрасхем і дыскрэтных паўправадніковых прыбораў на тэрыторыі СНД і Усходняй Еўропы (больш за мільярд мікрасхем і мільярд паўправадніковых прыбораў штогод). Прадпрыемства дынамічна развіваецца і актыўна нарошчвае аб'ёмы вытворчасці. Адкрытае акцыянернае таварыства «ІНТЭГРАЛ» – гэта комплекс прадпрыемстваў і канструктарскіх бюро, які забяспечвае поўны вытворчы цыкл: праектаванне, вытворчасць, маркетынг і суправаджэнне гатовай прадукцыі і па агульнасусветнай класіфікацыі адносіцца да прадпрыемстваў класу IDM (Identity management). За паўвекавы перыяд дзейнасці прадпрыемствам назапашаны значны вопыт у праектаванні і стварэнні мікраэлектроннай прадукцыі: мікрасхем, паўправадніковых прыбораў, вадкасна-крышталёвых экранаў і панэляў, спецыялізаванага тэхналагічнага абсталявання, вылічальнай тэхнікі, вузлоў і блокаў для бытавой і прамысловай электронікі, тэлефонных апаратаў, электронных пластыкавых карт, медыцынскіх прылад, электронных гульняў і інш. Штогод на ААТ «ІНТЭГРАЛ» вырабляецца звыш 250 тыпаў інтэгральных мікрасхем і дыскрэтных паўправадніковых прыбораў спецыяльнага прызначэння, асобныя тэхналагічныя цыклы па стварэнні мікраэлектронных кампанентаў для гэтых прылад займаюць каля 6 месяцаў. Прадукцыя прадпрыемства адпавядае патрабаванням нацыянальных і міжнародных стандартаў якасці. ААТ «ІНТЭГРАЛ» адрозніваеца ад замежных аналагічных кампаній невялікім коштам распрацовак, іх высокай надзейнасцю, стабільнымі тэхнічнымі параметрамі. На прадпрыемстве працуе звыш пяці тысяч чалавек (працуюць сапраўдныя прафесіяналы) з іх адзін член-карэспандэнт НАН Беларусі, пяць дактароў тэхнічных навук, тры прафесары, 18 кандыдатаў навук, адзін дацэнт і 11 лаўрэатаў Дзяржаўнай прэміі і Прэміі Савета Міністраў.

Матэрыял падрыхтаваны ў 2013 г.