Магілёўскі дзяржаўны бібліятэчны каледж імя А. С. Пушкіна – адзіная профільная навучальная ўстанова ў Рэспубліцы Беларусь, якая ажыццяўляе падрыхтоўку спецыялістаў бібліятэчнай справы з сярэдняй спецыяльнай адукацыяй.

Гісторыя каледжа пачалася ў пасляваенныя гады, калі ўзнікла неабходнасць у кваліфікаваных кадрах для бібліятэк. Рэспубліцы былі патрэбны людзі, якія б маглі прафесійна прапагандаваць дасягненні культуры, выхоўваць любоў да кнігі. 26 кастрычніка 1946 г. у адпаведнасці з Пастановай Савета Народных Камісараў Беларускай ССР № 1638 на базе Магілёўскай рэспубліканскай палітыка-асветніцкай школы быў заснаваны бібліятэчны тэхнікум. Яго першым дырэктарам стаў І. Л. Архіпенка. Навучальная ўстанова не мела ўласнага памяшкання і была размешчана ў будынку культурна-асветніцкага вучылішча імя Н. К. Крупскай. 1 ліпеня 1948 г. пераведзена ў сталіцу і перайменавана ў Мінскі бібліятэчны тэхнікум, якому ў 1949 г. было прысвоена імя А. С. Пушкіна. У тым жа годзе адбыўся першы выпуск спецыялістаў у колькасці 55 чалавек. У 1950 г. адкрылася завочнае аддзяленне. Новы этап у развіцці тэхнікума пачаўся ў жніўні 1961 г., калі ён быў зноў пераведзены ў Магілёў і пачаў працаваць у памяшканні машынабудаўнічага інстытута як Магілёўскі бібліятэчны тэхнікум імя А. С. Пушкіна. У студзені 1967 г. навучальная ўстанова атрымала новы будынак з актавай і спартыўнай заламі, праз тры гады інтэрнат.

Перыяд з 1978 па 1994 г. быў найбольш плённым у развіцці тэхнікума. Аб гэтым сведчылі штогадовыя прыёмы па 500 чалавек на дзённае аддзяленне, неаднаразовае атрыманне пераходнага сцяга за перамогу ва Усесаюзным сацыялістычным спаборніцтве. З 1994 г. установа адукацыі прымае актыўны ўдзел у падрыхтоўцы высокакваліфікаваных спецыялістаў бібліятэчнай справы ў комплексе «Беларускі дзяржаўны ўніверсітэт культуры і мастацтваў» – «Магілёўскі дзяржаўны бібліятэчны каледж імя А. С. Пушкіна» па сістэме бесперапыннай падрыхтоўкі спецыялістаў. Шматгадовае супрацоўніцтва дзвюх навучальных устаноў дае станоўчыя вынікі. З 1995 г. навучэнцы каледжа разам з асноўнай спецыяльнасцю пачалі атрымліваць дадатковыя спецыялізацыі: «Аўтаматызаваныя бібліятэчныя і інфармацыйныя сістэмы» з прысваеннем кваліфікацыі «Бібліятэкар-бібліёграф. Аператар аўтаматызаваных бібліятэчных і інфармацыйных сістэм»; «Арганізацыя культурна-забаўляльнай дзейнасці» з прысваеннем кваліфікацыі «Бібліятэкар-бібліёграф. Арганізатар культурна-забаўляльнай дзейнасці». Не самым спрыяльным для тэхнікума быў перыяд з 1994 па 2005 г., калі скарачаўся набор навучэнцаў. Тады нават узнімалася пытанне аб яго закрыцці. Аднак кіраўніцтва рабіла ўсё, каб гэтага не здарылася: закупляліся камп’ютары, пачалася рэканструкцыя інтэрната. З 1 верасня 2003 г. на платнай аснове адкрыўся набор навучэнцаў па новай спецыяльнасці «Дакументацыйнае забеспячэнне кіравання і архівазнаўства» з прысваеннем кваліфікацыі «Сакратар-рэферэнт, архівіст». Наступны этап развіцця звязаны з пераўтварэннем тэхнікума ва ўстанову адукацыі «Магілёўскі дзяржаўны бібліятэчны каледж імя А. С. Пушкіна» ў сакавіку 2009 г. У 2010 г. каледж быў адзначаны дыпломам рэспубліканскай выстаўкі «Комплексна-метадычнае забеспячэнне рэалізацыі адукацыйных стандартаў спецыяльнасцей у сярэдняй спецыяльнай адукацыі». З 2014 г. пры ім працавала аддзяленне павышэння кваліфікацыі для кіруючых работнікаў і спецыялістаў сістэмы культуры Магілёўскай вобласці.

За гады існавання змяняўся статус, прыярытэты і напрамкі дзейнасці каледжа, але галоўнымі былі і застаюцца высокі прафесіяналізм педагагічнага калектыву, практычная накіраванасць навучання. У каледжы ажыццяўляецца адукацыйная, навукова-даследчая, метадычная, сацыяльна-культурная, культурна-асветніцкая работа, у аснову якой пакладзена спалучэнне традыцыйных метадаў навучання з новымі прыёмамі і формамі. Для якаснага забеспячэння адукацыйнага працэсу прыцягваюцца высокакваліфікаваныя педагагічныя кадры, здольныя вырашаць задачы падрыхтоўкі і выхавання сучасных спецыялістаў у галінах бібліятэчнай і сакратарскай спраў. Сёння ў каледжы рыхтуюцца кадры па наступных спецыяльнасцях: «Бібліятэказнаўства і бібліяграфія», «Дакументазнаўства і дакументацыйнае забеспячэнне кіравання». Грунтоўныя веды дапамагаюць выпускнікам паступаць у вышэйшыя навучальныя ўстановы рэспублікі, станоўча ўплываюць на іх працаўладкаванне і будучую прафесійную дзейнасць. Выхаванцы каледжа паспяхова працуюць у нашай рэспубліцы і ў краінах СНД. Сярод іх – прафесар, дэкан факультэта інфармацыйна-дакументных камунікацый Беларускага дзяржаўнага ўніверсітэта культуры і мастацтваў М. А. Яцэвіч, прафесар кафедры інфармацыйных рэсурсаў гэтага ж універсітэта Н. А. Ляйко, дырэктар Бранскай абласной бібліятэкі С. С. Дзядзюля, дырэктар Гродзенскай абласной бібліятэкі Л. В. Мальцава і інш. Некаторыя з выпускнікоў каледжа сталі вядомымі літаратарамі – У. Марук, А. Махнач, А. Паўлухін, А. Чаркасаў і інш.

У 2017 г. Магілёўскі дзяржаўны бібліятэчны каледж імя А.С. Пушкіна далучаны да Магілёўскага дзяржаўнага каледжа мастацтваў.

Матэрыял падрыхтаваны ў 2016 г., актуалізаваны ў 2025 г.