Грамадскае аб’яднанне “Беларускі фонд культуры” (БФК) створана з мэтай адраджэння і развіцця нацыянальных традыцый, мовы, краязнаўчага руху, прафесійнай і аматарскай творчасці. БФК вядзе пошук і вяртанне музейных, архіўных і бібліятэчных каштоўнасцей, якія знаходзяцца за мяжой Беларусі, займаецца выяўленнем імён знакамітых грамадскіх, культурных дзеячаў мінулага і ўключэннем іх у гістарычную спадчыну народа.
Сваімі асноўнымі задачамі БФК лічыць садзеянне развіццю і ўмацаванню матэрыяльнай базы культуры Беларусі; расшырэнне ўдзелу розных груп насельніцтва ў культурным будаўніцтве, выкарыстанне іх творчых намаганняў і матэрыяльных магчымасцей; аказанне маральнай, матэрыяльнай і прававой падтрымкі ініцыятывам і пачынням грамадскасці, якія накіраваны на памнажэнне культурнай спадчыны, захаванне і выкарыстанне народных традыцый, развіццё краязнаўства, прафесійнай і аматарскай творчасці і г.д.; аказанне дапамогі моладзі ў творчым росце; адшуканне і вяртанне твораў мастацтва, архіўных матэрыялаў, іншых помнікаў гісторыі і культуры, якія знаходзяцца па-за межамі краіны; развіццё міжнародных сувязей і абменаў.
Для выканання задач распрацавана і ажыццяўляецца доўгатэрміновая праграма “Спадчына”, у адпаведнасці з якой камісіі і саветы фонду ладзяць “Каляды”, “Гуканне вясны”, “Купалле” і іншыя фальклорныя святы ў Друцку, Копысі, Міры, Карэлічах, Слуцку, арганізуюць выстаўкі твораў народных майстроў, культурных каштоўнасцей, якія паступаюць у дар БФК ад арганізацый і прыватных асоб, праводзяць дабрачынныя вечары. Стаў традыцыйным рэспубліканскі конкурс “Бібліятэка – асяродак нацыянальнай культуры”, конкурс мастакоў-сцэнографаў імя І.М. Ушакова і іншыя мерапрыемствы такога кшталту.
Вышэйшым кіруючым органам Беларускага фонду культуры з’яўляецца Рада, якая выбіраецца тэрмінам на пяць гадоў. Рада выбірае Выканаўчы камітэт на чале са старшынёй. Уладзімір Аляксандравіч Гілеп з’яўляецца старшынёй Рады БФК, галоўным рэдактарам “Краязнаўчай газеты” і ўзначальвае Беларускі камітэт Міжнароднага савета па ахове помнікаў і гістарычных мясцін.
Беларускі фонд культуры з’яўляецца адным з заснавальнікаў “Краязнаўчай газеты” – штотыднёвіка, які выдаецца з красавіка 2003 г. На старонках выдання змяшчаюцца артыкулы мясцовых краязнаўцаў, прысвечаныя гісторыі і традыцыям рэгіёнаў нашай краіны, даследаванні навукоўцаў пра гісторыю, этнаграфію, фальклор і архітэктуру, пра гістарычныя падзеі і асобы, а таксама расповеды пра нашых землякоў, якія праславіліся не толькі ў Беларусі, але і за яе межамі. Асобная ўвага надаецца публікацыям пра досвед краязнаўчых пошукаў і працу музеяў у школах і бібліятэках краіны. Сярод найбольш папулярных рубрык — “Малая краязнаўчая энцыклапедыя”, “Асоба ў краязнаўстве”, “Наша гісторыя: ідэі, падзеі, імёны”, “Школьнае краязнаўства”, “Рэгіён”, “Спадчына ў небяспецы” “Краязнаўчае краіназнаўства”, “Рэдкае выданне”, “Блакітны скарб Беларусі”, “Дарогамі гісторыі”, “Традыцыі і сучаснасць”, “Новае выданне”, “Гонар і лава”, “Адвечнае”. Некалькі гадоў існуе рубрыка, заснаваная ў рамках рэспубліканскай акцыі навучэнскай моладзі “Жыву ў Беларусі і тым ганаруся”.
Пры фондзе працуе выдавецтва “Беларускі фонд культуры”, створаны грамадскія камісіі “Вяртанне”, “Славутыя імёны Бацькаўшчыны”. Выдавецтва Беларускага фонду культуры наладзіла цеснае супрацоўніцтва з Міністэрствам культуры Рэспублікі Беларусь, музейнымі ўстановамі Беларусі, прыватнымі прадпрыемствамі і кампаніямі. З дапамогай спонсараў БФК быў падрыхтаваны шэраг выданняў. У 2011 г. выйшлі з друку тры кнігі з вершамі М. Багдановіча “Раманс”, “Пагоня”, “Слуцкія ткачыхі” на дзесяці мовах свету, прысвечаныя 120-годдзю з дня нараджэння паэта. У 2010 г. да 80-годдзя з дня нараджэння У.С. Караткевіча была выдадзена аповесць “Дзікае паляванне караля Стаха” на беларускай, рускай, украінскай, англійскай мовах з цудоўнымі ілюстрацыямі мастака Ю. Якавенкі. Выданне падрыхтавана Беларускім фондам культуры па ініцыятыве Міністэрства культуры Рэспублікі Беларусь, з арганізацыйнай і фінансавай дапамогай Беларускага камітэта Міжнароднага савета па ахове помнікаў і гістарычных мясцін і прыватнага прадпрыемства “Неф-праект” з Гальшан. 200-гадоваму юбілею А. Міцкевіча прысвечана выданне кнігі “Пан Тадэвуш” на беларускай і рускай мовах з ілюстрацыямі мэтра беларускага выяўленчага мастацтва В. Шаранговіча. Сярод іншых выданняў, падрыхтаваных і выдадзеных БФК, – кнігі навукова-папулярнага характару, зборнікі артыкулаў і дакументаў па праблемах пошуку і вяртання нацыянальных каштоўнасцей і інш.
Беларускі фонд культуры уваходзіць у Канфедэрацыю творчых саюзаў Рэспублікі Беларусь, цесна супрацоўнічае з Саюзамі народных майстроў і фалькларыстаў Беларусі, з дзяржаўнымі архівамі, бібліятэкамі, музеямі.
Матэрыял падрыхтаваны ў 2012 г.
