Беларускі саюз дызайнераў (БСД) – добраахвотная грамадская творчая арганізацыя, якая аб’ядноўвае спецыялістаў у галінах індустрыяльнага і графічнага дызайну; праектавання малых форм, інтэр’ераў, абсталявання, рэкламы, арт-дызайну; мадэльераў, педагогаў, тэарэтыкаў дызайну. Саюз дызайнераў мае на мэце развіццё і прапаганду творчай дзейнасці дызайнераў, абарону іх аўтарскіх правоў, прафесійных, эканамічных і сацыяльных інтарэсаў, павышэнне эфектыўнасці ўкладу дызайну ў развіццё культуры і эканомікі краіны.

Саюз дызайнераў Беларусі (з 1999 г. Беларускі саюз дызайнераў) быў створаны рашэннем устаноўчага з’езда дызайнераў Беларусі 14 снежня 1987 г. У 1991 г. на пазачарговым устаноўчым з’ездзе быў прыняты новы статут арганізацыі. Наступныя з’езды адбыліся ў 1993, 1995, 1999, 2002 і 2007 гг. У 1987 г. старшынёй праўлення БСД быў абраны А. Длатоўскі, з 1995 г. арганізацыю ўзначальвае Д. Сурскі.

БСД уваходзіць у асацыяцыю грамадскіх аб’яднанняў “Беларуская канфедэрацыя творчых саюзаў”, з’яўляецца членам міжнароднай асацыяцыі “Саюз дызайнераў”. Сёння Беларускі саюз дызайнераў налічвае больш за 600 членаў і мае абласныя аддзяленні ў Гродне і Віцебску. Члены БСД уваходзяць у склад галіновых мастацкіх саветаў, журы прафесійных конкурсаў і фестываляў, камісіі па прысуджэнні прэмій. Члены БСД унеслі значны ўклад у стварэнне школы савецкага і беларускага плаката: арганізоўвалі персанальныя выстаўкі ў розных гарадах свету, атрымлівалі ўзнагароды прэстыжных міжнародных конкурсаў і фестываляў. Работы беларускіх дызайнераў прадстаўлены ў самых вядомых музеях плаката ў Варшаве, Нью-Ёрку, Мехіка, Лондане і іншых гарадах.

З 2001 г. БСД выдае вытворча-практычны часопіс “PRO дизайн”, рыхтуе даведачныя выданні па дызайне “Белорусский союз дизайнеров” (1998), “Кто есть кто. Дизайн внутри и снаружи” (2008), “Знак-логотип” (2-е выд., 2009).

Беларускі саюз дызайнераў актыўна супрацоўнічае з Міністэрствам культуры і Міністэрствам інфармацыі Рэспублікі Беларусь, перыядычнымі выданнямі, замежнымі культурнымі арганізацыямі.

Матэрыял падрыхтаваны ў 2012 г.