Гідралагічны заказнік рэспубліканскага значэння “Дзікае” быў створаны на тэрыторыі Пружанскага (Брэсцкая вобласць) і Свіслацкага (Гродзенская вобласць) раёнаў у 1968 г. Мэтай заснавання стала зберажэнне ў натуральным стане аднайменнага балота нізіннага тыпу, якое падтрымлівае гідралагічны рэжым паўночнай часткі Нацыянальнага парку “Белавежская пушча”. У 1998 г. балота атрымала міжнародны статус ключавой арніталагічнай тэрыторыі, у 2015 г. – водна-балотнага ўгоддзя міжнароднага значэння.

Заказнік размяшчаўся ў межах Нарава-Ясельдзінскай раўніны на плошчы 15,2 тыс. га. Само балота пакрыта пераважна хмызняком і асакой, участкі з мінеральнымі глебамі – вольхай, бярозай, дубам. На тэрыторыі трапляліся рэдкія ахоўныя віды раслін – арніка горная, венерын чаравічак сапраўдны, зубніца клубняносная, лілея-саранка. Фаўна таксама даволі разнастайная. Тут зарэгістравана больш за 200 відаў пазваночных. Сустракаецца алень, казуля, воўк, рысь, ласка, куніца, балотная чарапаха, мядзянка. З 140 відаў птушак у Чырвоную кнігу Рэспублікі Беларусь занесены барадатая кугакаўка, пугач, арлан-белахвост, чорны бусел, шэры журавель, балотная сава, беласпінны і жоўтагаловы дзятлы, драч і інш. Міжнародная значнасць балота заключаецца ў тым, што на яго тэрыторыі гняздуюцца вяртлявая чарацянка, вялікі арлец і вялікі грыцук, якія знаходзяцца пад глабальнай пагрозай знікнення.

У 2001 г. тэрыторыя заказніка ўключана ў Нацыянальны парк “Белавежская пушча”.

Матэрыял падрыхтаваны ў 2023 г.