Прадукцыю адкрытага акцыянернага таварыства «Чырвоны Мазыранін» добра ведаюць не толькі на тэрыторыі нашай краіны, але далёка за яе межамі. Прадпрыемства выпускае лёгкія і карысныя кандытарскія прысмакі. Гісторыя фабрыкі пачынаецца ў далёкім 1913 г., калі заможны мясцовы памешчык Гарват у мястэчку Нароўля Рэчыцкага павета Мінскай губерні пабудаваў невялікую фабрыку для перапрацоўкі садавіны і гародніны з сваіх маёнткаў. Прадпрыемства прыносіла немалы прыбытак і з цягам часу ператварылася ў цукерачную фабрыку.

У выніку падзей Кастрычніцкай рэвалюцыі 1917 г. фабрыка была нацыяналізавана. Войны 1918–1920 гг. прывялі да поўнага разбурэння і заняпаду прадпрыемства. Толькі ў 1925 г. працоўныя г. Мазыра прынялі рашэнне аб аднаўленні фабрыкі. У гэтым жа годзе ў адрамантававаных памяшканнях прадпрыемства была выпушчана першая салодкая прадукцыя: зефір, мармелад, ірыс, павідла, джэм, пасціла. Працоўныя Нароўлі прапанавалі назваць фабрыку «Чырвоны Мазыранін» у гонар рабочых з Мазыра, якія дапамаглі аднавіць вытворчасць. У 1927 г. фабрыка ўвайшла ў аб’яднанне «Белкандытартрэст» і стала паступова набіраць моц. У 1930 г. большая частка абсталявання была механізавана, для павышэння якасці цукерак прымяняўся апарат «Вакуум».

Новы этап станаўлення фабрыкі прыйшоўся на пасляваенныя гады, калі прадпрыемства атрымала новае жыццё. Прадукцыя фабрыкі «Чырвоны Мазыранін» карысталася вялікім попытам, што прывяло да неабходнасці павелічэння вытворчых магутнасцей. У 1987 г. на фабрыцы быў уведзены ў эксплуатацыю новы вытворчы корпус, набыта новае абсталяванне, значна вырасла тэхнічная моц прадпрыемства, быў наладжаны выпуск каля 60 новых найменняў прадукцыі. У 1996 г. Нараўлянская фабрыка «Чырвоны Мазыранін» была ператворана ў адкрытае акцыянернае таварыства. У перыяд 2001–2003 гг. на прадпрыемстве адбылася частковая мадэрнізацыя: была ўсталявана нізкатэмпературная камера захоўвання масла і малака, адбылася рэканструкцыя тэхналагічнага абсталявання. У 2005 г. ААТ «Чырвоны Мазыранін» увайшло ў склад Беларускага дзяржаўнага канцэрна харчовай прамысловасці «Белдзяржхарчпрам».

Унікальныя тэхналогіі, заснаваныя на стогадовым вопыце, дазваляюць прадпрыемству і сёння выпускаць прадукцыю высокай якасці. На фабрыцы вырабляецца каля 150 найменняў цукровых кандытарскіх вырабаў. Візітнай карткай фабрыкі з'яўляюцца цукеркі «Коровка», «Пралесачка», ірыс «Белочка», зефір «Бело-розовый», «Загадочный», мармелад «Мишутка», «Карусель» і інш. Гонарам фабрыкі з’яўляецца выпуск цукерак з водарам кавуна, персіка, ванілі, маліны, клубніц. Асноўным напрамкам развіцця асартыменту кандытарскіх вырабаў з’яўляецца павышэнне яе харчовай і біялагічнай каштоўнасці. На прадпрыемстве дзейнічае акрэдытаваная вытворчая лабараторыя, якая здзяйсняе кантроль якасці сыравіны. Прадукцыя фабрыкі мае сертыфікаты адпаведнасці Рэспублікі Беларусь і Расійскай Федэрацыі, адпавядае патрабаванням міжнародных стандартаў.

Кандытарскія вырабы ААТ «Чырвоны Мазыранін» не раз былі адзначаны залатымі, сярэбранымі і бронзавымі медалямі на прэстыжных міжнародных выставах. Прадпрыемства штогод становіцца лаўрэатам конкурсаў «Лучшие товары года Республики Беларусь» и «Лучшие товары Республики Беларусь на рынке Российской Федерации». Салодкая прадукцыя ААТ «Чырвоны Мазыранін» паспяхова рэалізуецца як на рынках Беларусі, так і за яе межамі (Ізраіль, ЗША, краіны СНД).

Матэрыял падрыхтаваны ў 2013 г.