Прадпрыемства па перапрацоўцы малака ў Бярозе (Брэсцкая вобласць) пачало працаваць у жніўні 1944 г. У яго складзе дзейнічалі нізавыя падраздзяленні ў вёсках Пескі, Сялец і Сігневічы (Бярозаўскі раён Брэсцкай вобласці). Абсталяванне складалася з некалькіх ручных сепаратараў і ручной драўнянай маслабойкі. Працавала тут у той час 25 чалавек. Першапачаткова прадукцыя Бярозаўскага малочнага завода пастаўлялася толькі ў дзеючую армію, затым і для мясцовых спажыўцоў. З цягам часу з’явіліся новыя найменні тавараў: сыр “Расійскі”, масла, смятана, кісламалочныя прадукты. У 1959 г. у строй уведзена новая масларобчая лінія з магчымасцю перапрацоўкі 30 т малака за змену. Чарговая рэканструкцыя Бярозаўскага сыраробнага камбіната ў 1980-я гг. дазволіла наладзіць перапрацоўку ўжо 280 т малака за суткі, асвоіць выпуск плаўленых сыроў. У 1994 г. прадпрыемства рэарганізавана ў адкрытае акцыянернае таварыства. У наступныя гады вытворчасць працягвала пашырацца. Да камбіната былі далучаны Івацэвіцкі і Іванаўскі малочныя заводы, племянны завод “Прамень”, сельскагаспадарчае прадпрыемства “Земляроб” (Брэсцкая вобласць), Прадпрыемства ўвайшло ў склад холдынга «Канцэрн “Брэстмясамалпрам”». Сярод прадукцыі: паўцвёрдыя сычужныя і плаўленыя сыры, малако, кефір, ражанка, смятана, тварог і тварожныя прадукты, марожанае, сухія малочныя канцэнтраты і паўфабрыкаты. Па выніках работы кампанія стала шматразовым пераможцам конкурса “Выбар года”, лаўрэатам Прэміі Урада Рэспублікі Беларусь за дасягненні ў галіне якасці (2014).

У 2018 г. Бярозаўскі сыраробны камбінат быў выкуплены адкрытым акцыянерным таварыствам “Савушкін прадукт”. Яго цэхі, размешчаныя ў Бярозе, Івацэвічах і Іванава, у цяперашні час працягваюць сваю працу ў выглядзе вытворчых філіялаў таварыства. У апошнія гады на прадпрыемстве вядзецца мадэрнізацыя вытворчасці, што дазваляе падтрымліваць выпуск прадукцыі высокай якасці.

Матэрыял падрыхтаваны ў 2024 г.