Шпалерная вытворчасць у Мінску з’явілася яшчэ ў ХІХ ст. Прадпрымальнік А. С. Эпштэйн у 1898 г. запусціў спачатку адну шпалерную фабрыку, а ў 1910 г. атрымаў дазвол на будаўніцтва новай, для якой набыў абсталяванне і паравую машыну. Прадукцыя прадпрыемства прадавалася на мясцовых рынках, экспартавалася на Украіну і Каўказ, а ў 1912 г. удастоена залатога медаля Ніжагародскай ярмаркі. У гэты час тут працавала больш за 100 рабочых. У гады Першай сусветнай вайны фабрыка была дэманціравана. У 1923 г. на яе месцы пачала дзейнасць Мінская шпалерная фабрыка імя В. В. Вароўскага. Вядома, што працоўны калектыў у колькасці 40 чалавек выпускаў тут штодзень каля 5 тыс. шпалераў.

У гады Вялікай Айчыннай вайны фабрыка была разбурана. Аднаўленне адбылося ў 1946 г. У 1960-я гг. яна рэканструявана і ўвайшла ў склад вытворчага аб’яднання “Белпаперапрам”, у 1989 г. стала яго галоўным прадпрыемствам. У 1990-я гг. праведзена чарговае перааснашчэнне і рэарганізацыя ў адкрытае акцыянернае таварыства “Беларускія шпалеры. У 2009 г. да фабрыкі ў якасці філіялаў былі далучаны прадпрыемствы “Гомельшпалеры” і Добрушская папяровая фабрыка “Герой працы”. У 2011 г. на яе базе створана адкрытае акцыянернае таварыства «Кіруючая кампанія холдынга “Беларускія шпалеры”».

У цяперашні час прадпрыемства ўваходзіць у склад канцэрна “Беллеспаперапрам” і з’яўляецца буйнейшым вытворцам розных відаў паперы. Яго прадукцыя адзначана дыпломамі конкурсаў “Прадукт года”, “Лепшыя тавары Рэспублікі Беларусь”, “Лідэры прамысловасці Рэспублікі Беларусь”, “Лепшы экспарцёр”. Кіруючая кампанія холдынга “Беларускія шпалеры” з’яўляецца лаўрэатам Прэміі Урада Рэспублікі Беларусь за дасягненні ў галіне якасці (2007).

Матэрыял падрыхтаваны ў 2024 г.