ААТ «Гарадзейскі цукровы камбінат» – сучаснае шматпрофільнае прадпрыемства ў складзе канцэрна «Белдзяржхарчпрам», нацэленае на выпуск прадукцыі высокай якасці ў адпаведнасці з міжнароднымі стандартамі і патрабаваннямі спажыўцоў.

Рашэнне аб будаўніцтве новага цукровага завода ў пасёлку Гарадзея Нясвіжскага раёна было прынята ў 1956 г. 26 снежня 1959 г. Другі беларускі цукровы завод атрымаў першую прадукцыю: белы цукар-пясок. У 1960 г. прадпрыемства атрымала назву «Гарадзейскі цукровы завод». У 1961 г. тут штодня перапрацоўвалі 1,5 тыс. тон цукровых буракоў і выпускалі 150 тон цукру-пяску. У 1971 г. пачаўся выраб цукру з цукру-сырцу краін Цэнтральнай і Паўднёвай Амерыкі.

У 1996 г. Гарадзейскі цукровы камбінат быў пераўтвораны ў адкрытае акцыянернае таварыства. У 1997–2000 гг. адбылася маштабная мадэрнізацыя вытворчасці, што дазволіла значна павялічыць вытворчыя магчымасці. У 2012 г. камбінат перапрацоўваў да 10 тыс. тон цукровых буракоў 1,1 тыс. тон імпартаванага цукру-сырцу ў суткі і мог вырабляць да 1,5 тыс. тон белага цукру штодзень. У 2013 г. у прадпрыемства з’явіўся філіял у г. Стоўбцы, што дазволіла камбінату значна пашырыць асартымент прадукцыі з садавіны і гародніны і выйсці на замежныя рынкі. На сённяшні дзень Гарадзейскі цукровы камбінат прапануе цукровы пясок, цукар прэсаваны як звычайны, так і з вітамінам C, карыцай, лімонам; цукровую пудру ў рознай тары; фруктовую прадукцыю, якая ўключае ў сябе канфіцюры, павідла і фруктовыя напаўняльнікі; бураковы жом, які ідзе для прыгатавання корму для жывёлы; мелассу (бураковую патаку). Прадпрыемства мае трывалыя сувязі з сельскагаспадарчымі вытворцамі Мінскай, Гродзенскай і Віцебскай абласцей. Прадукцыя праходзіць лабараторны кантроль і адпавядае найвышэйшым стандартам якасці. Яе можна набыць у кожным беларускім горадзе, а таксама ў Расіі, Грузіі, Казахстане, Узбекістане, Малдове, Кыргызстане, Туркменістане, Таджыкістане, Арменіі і Ізраілі.

ААТ «Гарадзейскі цукровы камбінат» з’яўлялася лепшым экспарцёрам года, лепшым цукровым заводам Мытнага саюза за 2009–2013 гг., лепшым цукровым заводам Еўразійскага эканамічнага саюза за перыяд 2014–2018 гг.

Матэрыял падрыхтаваны ў 2023 г.