Мінская духоўная акадэмія імя свяціцеля Кірылы Тураўскага з’яўляецца адукацыйным, навукова-багаслоўскім і даследчым цэнтрам, які ажыццяўляе падрыхтоўку свяшчэннаслужыцеляў і выкладчыкаў царкоўных навучальных устаноў, а таксама іншых спецыялістаў вышэйшай кваліфікацыі ў галіне праваслаўнага багаслоўя. Акадэмія была заснавана ў 1996 г. Сінодам Беларускай праваслаўнай царквы па благаславенні патрыярха Маскоўскага і ўсяе Русі Аляксія ІІ. Да 2015 г. знаходзілася ў межах Свята-Успенскага Жыровіцкага манастыра (Слонімскі раён Гродзенскай вобласці). У верасні 2015 г. была пераведзена ў сталіцу Беларусі, дзе размясцілася ў комплексе будынкаў Духоўна-адукацыйнага цэнтра Беларускай праваслаўнай царквы. Першым кіраўніком акадэміі з’яўляўся мітрапаліт Філарэт (Вахрамееў), з 17 чэрвеня 2021 г. рэктарам стаў архімандрыт Афанасій (Сакалоў). Сярод выкладчыкаў былі не толькі вядучыя беларускія багасловы, але і аўтарытэтныя ў хрысціянскім свеце архірэі, прафесары, вучоныя-даследчыкі з Маскоўскай і Санкт-Пецярбургскай духоўных акадэмій, а таксама прадстаўнікі рэлігійных вучэбных устаноў замежных краін. Акадэмія з’яўляецца недзяржаўнай навучальнай установай, і яе вучэбныя праграмы адпавядаюць нормам і правілам, устаноўленым Навучальным камітэтам пры Свяшчэнным сінодзе Маскоўскага патрыярхату. Яна стала цэнтрам навукова-багаслоўскай дзейнасці. Асноўны змест навучання складаюць спецыяльныя багаслоўскія, царкоўна-гістарычныя і царкоўна-практычныя дысцыпліны, а таксама гуманітарныя і спецыяльныя курсы. Акрамя багаслоўя вывучаюцца гісторыя Беларусі, праваслаўе і беларуская культура, філасофія, педагогіка, царкоўна-славянская, лацінская, старажытна-грэчаская, англійская, нямецкая і іншыя мовы. У структуру акадэміі ўваходзяць наступныя кафедры: апалагетыкі, біблеістыкі і багаслоўя, царкоўнай гісторыі і царкоўна-практычных дысцыплін. Выкладчыкі і студэнты праводзяць вялікую навуковую работу. Іх працы друкуюцца ў часопісах «Труды Минской духовной академии» і «Скрижали», альманахах «Сектоведение» і «ΧΡΟΝΟΣ», зборніку студэнцкіх работ «Экспромт» і інш. Лепшыя выпускнікі акадэміі працягваюць адукацыю ў магістратуры, якая была адкрыта ў жніўні 2013 г. У 2015 г. адбыўся першы яе выпуск. У гэтым жа годзе пры акадэміі пачала дзейнічаць аспірантура. За час існавання Мінская духоўныя акадэмія пацвердзіла высокі навуковы патэнцыял як у Беларусі, так і за яе межамі.

Матэрыял падрыхтаваны ў 2026 г.