Навукова-практычны цэнтр Нацыянальнай Акадэміі навук Беларусі па жывёлагадоўлі быў заснаваны ў 1949 г. як Інстытут жывёлагадоўлі. Базай для стварэння навуковай установы паслужыў аддзел жывёлагадоўлі Беларускага інстытута сацыялістычнай сельскай гаспадаркі Акадэміі навук БССР. Першым дырэктарам стаў акадэмік Х.С. Гарагляд. У пачатку існавання інстытута фарміраваўся калектыў і тэматыка навукова-даследчай работы. У 1952 г. у інстытуце было пяць навуковых падраздзяленняў, якія працавалі над вырашэннем актуальных пытанняў кармлення і развядзення сельскагаспадарчых жывёл, вывучэннем і ўдасканаленнем мясцовых парод і пародных груп буйной рагатай жывёлы, свіней, коней і інш. У сакавіку 1956 г. Інстытут жывёлагадоўлі Акадэміі навук БССР перайменаваны ў Беларускі навукова-даследчы інстытут жывёлагадоўлі. Уваходзіў ён у сістэму Міністэрства сельскай гаспадаркі БССР. У 1957 г. створана Акадэмія сельскагаспадарчых навук БССР, і інстытут быў перададзены ў яе падпарадкаванне. У пачатку 1960-х гг. праводзіліся даследаванні па вывучэнні пажыўнай каштоўнасці абязводжаных кармоў, тэхналогіі актыўнага вентыліравання сена, метадаў апрацоўкі саломы. З 1961 г. інстытут знаходзіцца ў Жодзіне. У 1970-я‒1980-я гг. была значна перапрацавана структура інстытута і зменена тэматыка навуковых даследаванняў. Прыярытэтным кірункам стала распрацоўка тэхналогій вытворчасці прадуктаў жывёлагадоўлі ў прамысловых умовах, метадаў вывядзення розных тыпаў жывёл для прамысловых комплексаў, развіццё сістэмы рацыянальнага харчавання і ўтрымання жывёл і інш. У розныя гады ў інстытуце працавалі В.Ц. Горын, У.В. Горын, К.М. Сонцаў, І.І. Будзевіч, В.М. Галушка, А.Ф. Трафімаў, І.П. Шыйко і інш. У 2006 г. установа атрымала сучасную назву.

Цяпер Навукова-практычны цэнтр НАН Беларусі па жывёлагадоўлі ‒ адзіная ў краіне ўстанова ў галіне селекцыі, узнаўлення, тэхналогіі ўтрымання і распрацоўкі эфектыўных рацыёнаў кармлення сельскагаспадарчых жывёл. Асноўная мэта яго дзейнасці ‒ развіццё навуковага патэнцыялу рэспублікі ў галіне жывёлагадоўлі. Цэнтр займаецца павышэннем эфектыўнасці жывёлагадоўлі, правядзеннем навуковых даследаванняў і ўкараненнем навуковых распрацовак у вытворчасць, павышэннем кваліфікацыі спецыялістаў жывёлагадоўлі. У структуры цэнтра функцыянуюць 15 лабараторый, аддзел навукова-тэхнічнай інфармацыі і ідэалагічнай работы, аддзел матэрыяльна-тэхнічнага і аўтатранспартнага забеспячэння, аспірантура, дактарантура. Прыярытэтныя кірункі навуковых даследаванняў ‒ стварэнне новых высокапрадукцыйных парод, тыпаў і ліній сельскагаспадарчай жывёлы, распрацоўка рэцэптаў камбікармоў і кармавых дабавак, удасканаленне тэхналогій кармлення, утрымання і ўзнаўлення сельскагаспадарчай жывёлы. Інстытут ажыццяўляе каардынацыю дзейнасці чатырох унітарных прадпрыемстваў ‒ Інстытута эксперыментальнай ветэрынарыі імя С. М. Вышалескага, Інстытута рыбнай гаспадаркі, Доследнай навуковай станцыі па птушкагадоўлі, сельскагаспадарчага прадпрыемства «ЖодзінаАграПрамЭліта». З 1958 г. выдае штогадовы зборнік навуковых прац «Зоотехническая наука Беларуси».

Матэрыял падрыхтаваны ў 2024 г.