Дзеншчыкоў Пётр Іосіфавіч

Date of Birth: 15.09.1918 Расія

Date of death: 09.01.1980 Індура, в., Гродзенскі раён

Quick reference: работнік сельскай гаспадаркі (старшыня калгаса), Герой Сацыялістычнай Працы (1971), узнагароджаны двума ордэнамі Леніна (1958; 1971), ордэнамі Кастрычніцкай Рэвалюцыі (1978), Працоўнага Чырвонага Сцяга (1965), медалём "За працоўную доблесць" (1948), знакамі "Выдатнік аховы здароўя СССР" і "Выдатнік народнай адукацыі СССР"

Name Options: Дзеньшчыкоў Пётр Іосіфавіч

Names in other languages: Деньщиков Петр Иосифович (russian);

Пётр Іосіфавіч Дзеншчыкоў нарадзіўся ў Цюмені. З 1921 г. разам з бацькамі жыў у вёсцы Магіляны Бераставіцкага раёна Гродзенскай вобласці. З ранняга дзяцінства быў парабкам у багатых людзей. Пасля далучэння Заходняй Беларусі да СССР у 1939 г. быў прызначаны рахункаводам новастворанага калгаса, вясной 1941 г. выконваў абавязкі старшыні.

У пачатку Вялікай Айчыннай вайны быў прызваны ў Чырвоную Армію, скончыў школу авіяцыйных спецыялістаў і служыў радыстам, прымаў удзел у баях.

Пасля звальнення ў запас у 1947 г. вярнуўся ў сяло, некаторы час працаваў загадчыкам абутковай майстэрні ў вёсцы Індура, затым быў абраны старшынёй Індурскага сельскага Савета дэпутатаў працоўных. 2 лютага 1951 г. быў абраны старшынёй калгаса імя Сталіна (пазней – калгас «Авангард») Гродзенскага раёна, створанага пасля аб’яднання пяці невялікіх гаспадарак. Пад кіраўніцтвам П.І. Дзеншчыкова калгас імя Сталіна стаў моцнай гаспадаркай, дзе ўраджайнасць збожжавых дасягала 45 цэнтнераў з гектара. Калгас меў малочнатаварны комплекс, механізаваны кармацэх, сучасныя збожжасховішчы. Шмат увагі надавалася сацыяльнай сферы: дзейнічалі клуб, школа, бальніца, дзіцячы садок.

Указам Прэзідыума Вярхоўнага Савета СССР ад 8 красавіка 1971 г. за выдатныя поспехі, дасягнутыя ў развіцці сельскагаспадарчай вытворчасці і выкананні пяцігадовага плана продажу дзяржаве прадуктаў земляробства і жывёлагадоўлі, Пятру Іосіфавічу Дзеншчыкову было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».

Пётр Іосіфавіч Дзеншчыкоў узначальваў калгас да 1980 г., у 1970–1974 гг. з’яўляўся дэпутатам Вярхоўнага Савета СССР, у 1962–1965 гг. уваходзіў у склад Вярхоўнага Савета БССР, быў членам рэспубліканскага Савета калгасаў.

Узнагароджаны двума ордэнамі Леніна (18.01.1958; 08.04.1971), ордэнамі Кастрычніцкай Рэвалюцыі (29.03.1978), Працоўнага Чырвонага Сцяга (31.12.1965), медалямі, у тым ліку «За працоўную доблесць» (30.12.1948), знакамі «Выдатнік аховы здароўя СССР» і «Выдатнік народнай адукацыі СССР».

Імя Пятра Іосіфавіча Дзеншчыкова прысвоена калгасу «Авангард» (цяпер СВК імя П.І. Дзеншчыкова), на будынку праўлення ўстаноўлена мемарыяльная дошка. Прыз імя П.І. Дзеншчыкова штогод прысуджаецца лепшай гаспадарцы Гродзенскага раёна ў вытворчасці жывёлагадоўчай прадукцыі.

Пераклад 2021 г. матэрыялаў інтэрнэт-праекта «Герои страны».