Творчасць Армена Багратавіча Грыгар’янца шырока вядома сярод прыхільнікаў тэатральнага мастацтва і жывапісу. Ён аўтар мастацкага афармлення многіх спектакляў розных жанраў і шэрага кінафільмаў.

Нарадзіўся А. Грыгар’янц у г. Андыжан ва Узбекістане. Скончыў Ленінградскае мастацка-педагагічнае вучылішча (1939). Працаваў у тэатрах Масквы, Ташкента, Вільнюса, Ерэвана, Кіева і інш. З 1953 г. ён галоўны мастак Дзяржаўнага рускага драматычнага тэатра БССР імя М. Горкага, з 1962 па 1975 г. галоўны мастак Беларускага тэатра імя Я. Купалы. З 1958 па 1976 г. выкладаў у Беларускім дзяржаўным тэатральна-мастацкім інстытуце. З 1952 г. ён член Беларускага саюза мастакоў. У 1955 г. стаў заслужаным дзеячам мастацтваў БССР.

Творчасці А. Грыгар’янца ўласцівы глыбокае разуменне жанравай асновы спектакля, арганічнае спалучэнне традыцыйных і наватарскіх метадаў, выразнасць і праўдзівасць створаных вобразаў. Дэкарацыі адметныя каларыстычнай насычанасцю. Сярод лепшых работ майстра вылучаюцца афармленні спектакляў «Кароль Лір» У. Шэкспіра і «Каварства і каханне» Ф. Шылера (1953), «Брэсцкая крэпасць» К. Губарэвіча (1954), «Салавей» З. Бядулі (1956), «Аптымістычная трагедыя» У. Вішнеўскага (1957), «Забыты ўсімі» Назыма Хікмета (1958), «Беспасажніца» А. Астроўскага і «Чацвёрты» К. Сіманава (1962), «У мяцеліцу» Л. Лявонава, «Я, бабуся, Іліко і Іларыён» Н. Думбадзэ і Р. Лордкіпанідзэ (1965), «Людзі на балоце» паводле І. Мележа (1966, з Б. Герлаванам), «Багема» Дж. Пучыні і «Рыгалета» Дж. Вердзі (1968), «Трыбунал» А. Макаёнка (1971), «У ноч зацьмення месяца» М. Карыма (1972), «Забыць Герастрата!» Р. Горына (1974), «Гульня з кошкай» І. Эркеня (1976). Армен Грыгар’янц з’яўляецца мастаком і рэжысёрам спектакляў «Матухна Кураж і яе дзеці» Б. Брэхта (1962) і «Цудоўная дудка» В. Вольскага (1968). Ён мастак кінафільмаў «Палеская легенда» (1957), «Чырвонае лісце» (1958, абодва з У. Белавусавым) і інш. Выключнае майстэрства А. Грыгар’янц праявіў у рабоце над спектаклем «Кароль Лір». Гэта пастаноўка адзначана адзінствам творчай задумы рэжысёра і мастака, касцюмы падкрэслівалі своеасаблівасць характару кожнага персанажа. Таксама вельмі ўдалым атрымалася афармленне ім казачнага спектакля «Цудоўная дудка». Цікавымі з’яўляюцца і работы над п’есамі Н. Хікмета. У 1958 г. у Таліне на фестывалі «Трэцяя Прыбалтыйская вясна» А. Грыгар’янц за афармленне спектакля «Забыты ўсімі» быў узнагароджаны прэміяй і дыпломам лаўрэата. У 2008 г. у філіяле Дзяржаўнага музея гісторыі тэатральнай і музычнай культуры Рэспублікі Беларусь «Гасцёўня Уладзіслава Галубка» праходзіла выстаўка, прысвечаная мастаку тэатра. Былі прадстаўлены архіўныя дакументы, фотаздымкі, аўтапартрэт, эскізы афіш, дэкарацый, касцюмаў і інш.

За майстэрства і плённую працу А. Грыгар’янц узнагароджаны ордэнам «Знак Пашаны», медалямі, дзвюма Ганаровымі граматамі Вярхоўнага Савета БССР, Ганаровымі граматамі Літоўскай і Азербайджанскай ССР.

Матэрыял падрыхтаваны ў 2018 г.