Беларускі вучоны ў галіне біяхіміі і радыебіялогіі Яўген Фёдаравіч Канапля нарадзіўся ў сялянскай сям'і. У 1962 г. скончыў лячэбны факультэт Мінскага дзяржаўнага медыцынскага інстытута і паступіў у аспірантуру пры НДІ анкалогіі і медыцынскай радыялогіі Міністэрства аховы здароўя БССР. Адначасова Я.Ф. Канапля займаўся арганізацыяй у інстытуце гарманальнай лабараторыі. У 1965 г., пасля заканчэння аспірантуры і абароны кандыдацкай дысертацыі на тэму «Экскреция эстрогенов и гонадотропинов у больных с далеко зашедшим раком молочной железы при адреналэктомии и применение преднизолона на фоне овариоэктомии», узначаліў лабараторыю. З 1969 г. кіраваў аддзяленнем лабараторных метадаў дыягностыкі НДІ анкалогіі і медыцынскай радыялогіі. У 1976 г. ён абараніў доктарскую дысертацыю па навуковым абгрунтаванні і ацэнцы эфектыўнасці лячэння рака малочнай залозы з выкарыстаннем гарманальнага, хіміятэрапеўтычнага, прамянёвага лячэння і іх камбінацыі. З 1981 г. Яўген Фёдаравіч – загадчык сектара геранталогіі АН БССР і адначасова кіраўнік лабараторыі біяхіміі. У 1986 г. выбраны членам-карэспандэнтам АН БССР. У 1987 г. пры непасрэдным удзеле вучонага быў арганізаваны Інстытут радыебіялогіі НАН Беларусі, дырэктарам якога ён стаў. У 1989 г. выбраны акадэмікам НАН Беларусі.

Асноўны напрамак навуковых даследаванняў Я.Ф. Канаплі – вывучэнне біяхімічных механізмаў дзеяння гармонаў, нейрагарманальнай рэгуляцыі, уплыву радыяцыі на жыццяздольнасць арганізма, метадаў карэкцыі аддаленых і бліжэйшых вынікаў пры апрамяненні. Ён – аўтар больш за 350 навуковых прац, у тым ліку 12 манаграфій. Значная частка работ прысвечана высвятленню біяхімічных асноў развіцця структурна-функцыянальных парушэнняў у арганізме пры ўзнікненні паталагічных працэсаў. Сярод іх – «Цитоплазматическая рецепция стероидных гормонов» (у суаўтарстве, 1991), «Радиация и Чернобыль. Щитовидная и паращитовидные железы. Кальций-фосфорный обмен» (у суаўтарстве, 2005), «Радиация и Чернобыль: трансурановые элементы на территории Беларуси» (у суаўтарстве, 2007), «Радиация и Чернобыль: короткоживущие радионуклиды на территории Беларуси» (у суаўтарстве, 2008) і інш. У Інстытуце радыебіялогіі НАН Беларусі пад кіраўніцтвам Я.Ф. Канаплі праводзіліся даследаванні па высвятленні асаблівасцей дзеяння малых доз радыяцыі на механізмы нейрагарманальнай рэгуляцыі і функцыянальны стан найважнейшых сістэм арганізма з мэтай распрацоўкі метадаў павышэння яго радыеўстойлівасці, а таксама даследаванні па ацэнцы ўплыву радыеэкалагічнага становішча на жыццядзейнасць арганізма і высвятленні заканамернасцей назапашвання і вывядзення з арганізма радыенуклідаў, стварэнні спосабаў уздзеяння на гэтыя працэсы. Вучоным была праведзена вялікая навукова-арганізацыйная праца па фарміраванні Рэспубліканскай праграмы комплексных навуковых даследаванняў, звязаных з ліквідацыяй наступстваў аварыі на ЧАЭС. Па дадзенай праграме Інстытут радыебіялогіі НАН Беларусі быў зацверджаны галаўной установай у рэспубліцы, а Я.Ф. Канапля ўзначаліў Міжведамасны навукова-каардынацыйны савет. Па выніках навуковых дзеянняў распрацаваны канцэпцыя пражывання насельніцтва на радыеактыўна забруджаных тэрыторыях, якая пакладзена ў аснову Дзяржаўнай праграмы Рэспублікі Беларусь па мiнiмiзацыi i пераадоленні наступстваў катастрофы на ЧАЭС, шэраг законаў па сацыяльнай абароне пацярпелага насельніцтва і прававым рэжыме радыеактыўна забруджаных тэрыторый. З удзелам вучонага ў 2006 г. быў створаны Гомельскі філіял НАН Беларусі.

Яўген Фёдаравіч з'яўляўся намеснікам акадэміка-сакратара Аддзялення медыка-біялагічных навук НАН Беларусі, членам Бюро Навуковага савета па радыебіялогіі РАН і шэрага іншых навуковых саветаў, галоўным рэдактарам журнала «Весці НАН Беларусі. Серыя медыцынскіх навук». Вялікую ўвагу ён удзяляў падрыхтоўцы высокакваліфікаваных кадраў: пад яго кіраўніцтвам абаронены 4 доктарскія і 20 кандыдацкіх дысертацый. У 2004 г. вучоны стаў заслужаным дзеячам навукі Рэспублікі Беларусь.

Матэрыял падрыхтаваны ў 2019 г.