У міжнародных навуковых колах вучоны Сяргей Уладзіміравіч Абламейка шырока вядомы як буйны спецыяліст у галіне інфарматыкі, інфармацыйных тэхналогій, апрацоўкі выяў і распазнавання вобразаў.

Нарадзіўся ён у г. п. Воранава Гродзенскай вобласці ў сям’і інжынера-землеўпарадчыка. Пасля заканчэння сярэдняй школы ў 1973 г. паступіў на механіка-матэматычны факультэт Беларускага дзяржаўнага ўніверсітэта імя У. І. Леніна (БДУ). Навуковай працай пачаў займацца яшчэ ў час вучобы і пераддыпломнай практыкі, якую праходзіў у Інстытуце тэхнічнай кібернетыкі Акадэміі навук БССР (зараз Нацыянальная акадэмія навук (НАН Беларусі)). Яго дыпломная работа была апублікавана ў навукова-тэхнічным зборніку інстытута «Теория и методы автоматизации проектирования» і ўдастоена ўзнагароды за першую навуковую публікацыю сярод маладых навукоўцаў.

Пасля заканчэння вучобы з 1978 па 2008 г. працаваў у інстытуце (з 2002 г. – Аб’яднаны інстытут праблем інфарматыкі НАН Беларусі) спачатку стажорам-даследчыкам, малодшым навуковым супрацоўнікам, кіраўніком групы. З 1986 г. быў загадчыкам лабараторыі апрацоўкі і распазнавання выяў, з 1998 г. намеснікам дырэктара. З 2002 па 2008 г. з’яўляўся генеральным дырэктарам інстытута. Даследаваў пытанні стварэння аўтаматычнай апрацоўкі картаграфічных выяў. Вучоным былі распрацаваны метады папярэдняй апрацоўкі растравай графічнай інфармацыі і пабудовы лічбавай мадэлі графічнага дакумента па яго растравым ўяўленні, а таксама створана спецыяльнае праграмнае забеспячэнне. Вынікі даследаванняў ляглі ў аснову дысертацыі, якую С. У. Абламейкі абараніў у 1984 г. У далейшым вучоны развіваў даследаванні ў абраным кірунку і ў 1989 г. абагульніў іх у манаграфіі «Обработка и отображение информации в растровых графических системах» (у суаўтарстве). Гэта тэма таксама склала аснову доктарскай дысертацыі С. У. Абламейкі (1990). Распрацаваныя ім сумесна з вучнямі асновы тэорыі, метады, алгарытмы і сістэмы апрацоўкі і распазнавання розных класаў графічных выяў атрымалі шырокую міжнародную вядомасць і прызнанне і выкарыстоўваюцца ў шматлікіх галінах народнай гаспадаркі Беларусі і іншых краін.

У 1992 г. С. У. Абламейку прысвоена вучонае званне прафесара. У 1998 г. за вялікі ўклад у развіццё тэорыі апрацоўкі выяў быў абраны галоўным членам Міжнароднай асацыяцыі па распазнаванні вобразаў (IAPR). У 2004–2006 гг. з’яўляўся яе віцэ-прэзідэнтам, у 2006–2008 гг. першым віцэ-прэзідэнтам. У 2004 г. абраны членам-карэспандэнтам НАН Беларусі і прызначаны членам яе Прэзідыума. У 2005–2012 гг. быў акадэмікам-сакратаром Аддзялення фізікі, матэматыкі і інфарматыкі НАН Беларусі. На працягу многіх гадоў У. С. Абламейка працаваў прафесарам кафедры матэматычнага забеспячэння АСК факультэта прыкладной матэматыкі і інфарматыкі БДУ, выкладаў у Беларускім дзяржаўным універсітэце інфарматыкі і радыёэлектронікі. У 2008 г. прызначаны рэктарам БДУ. У 2009 г. абраны акадэмікам НАН Беларусі. Вучоны быў навуковым кіраўніком праграм Саюзнай дзяржавы Расіі і Беларусі «Космас-БР» і «СКІФ». Ён унёс вялікі ўклад у развіццё даследаванняў па касмічнай тэматыцы ў Беларусі і стварэнне найбольш моцных на тэрыторыі СНД суперкамп’ютараў.

Сяргей Уладзіміравіч Абламейка з’яўляецца аўтарам больш за 450 навуковых прац, у тым ліку 15 манаграфій. Сярод іх – «Географические информационные системы. Создание цифровых карт» (2000, у суаўтарстве), «Кибернетика жизни: размышления академика» (2012), «Космонавтика Беларуси» (2014) і інш. Вучоны – адзін з аўтараў вучэбных дапаможнікаў «Обработка изображений: технология, методы, применение» (2000), «Глобальные навигационные спутниковые системы» (2011), «Малые космические аппараты» (2012) і інш. Кнігі С. У. Абламейкі выдаюцца ў ЗША, Вялікабрытаніі, Нідэрландах, Польшчы і іншых краінах. Ён галоўны рэдактар часопісаў «Весці Нацыянальнай акадэміі навук Беларусі. Серыя фізіка-матэматычных навук» і «Вестник БГУ», уваходзіць у рэдакцыйныя саветы часопісаў «Наука и инновации», «Информатика», член рэдкалегій часопісаў «Вестник компьютерных и информационных технологий», «Pattern Recognition and Image Analysis» і інш. Сяргей Уладзіміравіч Абламейка выконвае абавязкі намесніка старшыні Нацыянальнага савета па космасе Рэспублікі Беларусь. Ён член Камісіі па пытаннях дзяржаўнай навукова-тэхнічнай палітыкі пры Савеце Міністраў Рэспублікі Беларусь, член Прэзідыума Рэспубліканскага савета рэктараў Беларусі і шэрагу іншых навуковых саветаў. З 2015 г. з’яўляецца віцэ-прэзідэнтам Еўразійскай асацыяцыі ўніверсітэтаў. Вучоны абраны акадэмікам Еўрапейскай акадэміі, Расійскай акадэміі касманаўтыкі імя К. Э. Цыялкоўскага, Іспанскай каралеўскай акадэміі дактароў і шэрагу іншых акадэмій. Узнагароджаны ордэнам Дружбы Расійскай Федэрацыі (2009), бронзавым медалём Норберта Вінера Міжнароднай акадэміі навук інфармацыі, інфармацыйных працэсаў і тэхналогій (2003), медалём Францыска Скарыны (2007), залатым медалём Ю. Гагарына Федэрацыі касманаўтыкі Расіі (2007), ордэнам К. Э. Цыялкоўскага Федэрацыі касманаўтыкі Расіі (2015) і інш. Ён лаўрэат прэміі Ленінскага камсамола Беларусі (1990), Дзяржаўнай прэміі Беларусі ў галіне навукі і тэхнікі (2002), прэмій НАН Беларусі за лепшую манаграфію (1998) і цыкл работ «Медицинские информационные технологии и системы» (2007), сумеснай прэміі НАН Беларусі і Расійскай акадэміі навук (2009). Вучонаму прысвоена званне ганаровага прафесара Гродзенскага дзяржаўнага ўніверсітэта імя Я. Купалы, Маскоўскага дзяржаўнага ўніверсітэта імя М. В. Ламаносава, Далянскага політэхнічнага ўніверсітэта (Кітай), Універсітэта Бінь Зыёнг (В’етнам) і інш.

Матэрыял падрыхтаваны ў 2016 г.