Біяграфія Міхаіла Якаўлевіча Фінберга пачалася ў разбураным пасляваенным Мазыры. Ужо ў раннім дзяцінстве праявілася яго любоў да музыкі. Нягледзячы на цяжкае матэрыяльнае становішча, бацькі аддалі Міхаіла ў Мазырскую музычную школу. Там ён пачаў іграць на скрыпцы, але праз тры гады вырашыў шукаць нешта іншае і ў выніку спыніўся на духавых інструментах. Дзесяць год было аддадзена арміі і працы ў вайсковым духавым аркестры, пяць гадоў – эстрадна-сімфанічнаму аркестру Беларускага радыё і тэлебачання пад кіраўніцтвам Б. Райскага. У 1970 г. М. Фінберг скончыў Беларускую кансерваторыю па класу трамбона. З 1971 г. пачаў выкладаць у Беларускай акадэміі музыкі, напісаў дзве навуковыя працы – дапаможнікі для студэнтаў-музыкантаў. У 1997 г. яму было прысвоена званне прафесара.

У 1970 г. М. Фінберг узначаліў аркестр Мінскага цырка. Менавіта пад кіраўніцтвам маэстра аркестр хутка дамогся значных творчых поспехаў і паступова са спецыфічнага цыркавога ператварыўся ў канцэртны калектыў. М. Фінберг шмат аранжыраваў, напісаў музыку больш як да 150 цыркавых спектакляў. У гэтыя ж гады ён працягваў займацца сваёй музычнай адукацыяй, на гэты раз у кансерваторскай аспірантуры, дзе дасканала авалодаў сакрэтамі дырыжорскай тэхнікі (1981). У кансерваторыі М. Фінберг сфарміраваў студэнцкі эстрадны аркестр з маладых таленавітых музыкантаў. Многія з выканаўцаў увайшлі ў Дзяржаўны аркестр сімфанічнай і эстраднай музыкі Рэспублікі Беларусь, які ўзнік 21 лютага 1987 г. (з 2005 г. – Нацыянальны аркестр сімфанічнай і эстраднай музыкі). Галоўныя напрамкі дзейнасці аркестра – папулярызацыя беларускай народнай песні, інструментальнай і джазавай музыкі, пошук і адкрыццё новых імён. Сярод праектаў – міжнародныя фестывалі, канцэрты, аўтарскія вечары, выступленні з таленавітымі дзецьмі… Рэпертуар Дзяржаўнага аркестра М. Фінберг пастаянна ўзбагачае новымі песнямі беларускіх аўтараў. Былі прадстаўлены праграмы з твораў А. Міцкевіча, М. Багдановіча, А. Куляшова, Н. Гілевіча, Г. Бураўкіна, У. Някляева, В. Аколавай, песенны вянок на вершы Я. Купалы і Я. Коласа – да 120-годдзя з дня нараджэння паэтаў.

З 1993 г. Аркестр сімфанічнай і эстраднай музыкі працуе над нацыянальнымі фестывалямі паэзіі і песні ў Маладзечне. Там жа адбылася прэм’ера “Анталогіі беларускай паэзіі і песні”, да якой кіраўнік калектыву ішоў амаль 20 гадоў. Прагучала больш за 30 лепшых твораў беларускіх паэтаў і кампазітараў XVI–XXI стст. Таму невыпадкова, што грамадскасць з ухваленнем сустрэла прысуджэнне М. Фінбергу Дзяржаўнай прэміі Беларусі за 1996 г. як аднаму з найбольш актыўных прапагандыстаў нацыянальнай музыкі.

Фестывальную геаграфію аркестра складаюць таксама Мсціслаў, Мір, Тураў, Заслаў’е, Нясвіж – гарады, адметныя сваёй самабытнай мінуўшчынай, старадаўняй духоўнай, культурнай спадчынай. Там праходзілі фестывалі камернай музыкі. Надзвычайную папулярнасць у нашай рэспубліцы і ў многіх краінах блізкага і далёкага замежжа аркестр набыў дзякуючы славутаму “Славянскаму базару” ў Віцебску, праграме “Спяваем разам з аркестрам”, 678 праграмам “Угадай мелодыю”, маскоўскаму фестывалю “Прыступка да Парнаса”, выступленням на тэлебачанні Італіі, адзначанымі “Гран-пры”. Да гэтага яшчэ трэба дадаць работу ў канцэртнай зале “Расія”, а таксама ўдзел у праграме “Плошча зорак”. Была закладзена і зорка М. Фінберга, і як адзначаў сам маэстра, – гэта вынік дзейнасці ўсяго аркестра, усёй краіны.

Няспынныя рэпетыцыі, гастрольныя паездкі і канцэрты – у гэтым жыццё і сэнс дзейнасці слыннага дырыжора. Стымулам жа застаюцца аншлагі, пры якіх заўсёды праходзяць выступленні Нацыянальнага аркестра сімфанічнай і эстраднай музыкі Рэспублікі Беларусь.

Матэрыял падрыхтаваны ў 2006 г.