Цімафей Сцяпанавіч Барадзін нарадзіўся і жыў у Гомелі. У 1936-1941 гг. працаваў інжынерам фабрыкі “Палесдрук”. У 1941 г. скончыў Маскоўскі паліграфічны інстытут, дзе вучыўся завочна. Напярэдадні вайны Цімафей Барадзін знаходзіўся ў Брэсце. У жніўні 1941 г. вярнуўся ў Гомель, дзе застаўся ў якасці арганізатара дыверсійнай і падпольнай работы. Пад яго кіраўніцтвам падпольшчыкі наладжвалі сувязі з іншымі патрыятычнымі групамі, стваралі яўкі, далучалі да сваёй дзейнасці надзейных людзей.

Адной з першых баявых аперацый групы падпольшчыкаў была спроба падрыву элеватара. У час яе падрыхтоўкі Цімафей Барадзін быў арыштаваны. З дапамогай мясцовых жыхароў ён быў вызвалены, уладкаваўся на працу ў друкарню. З цягам часу на прадпрыемстве група падпольшчыкаў пад кіраўніцтвам Барадзіна пачала друкаваць і распаўсюджваць лістоўкі, вырабляла пашпарты для падпольшчыкаў і былых ваеннапалонных. Цімафей Барадзін і яго таварышы ўсталявалі цесныя кантакты з падпольнымі групамі, якія дзейнічалі на паравозавагонарамонтным заводзе, электрастанцыі, дрэваапрацоўчым камбінаце і іншых прадпрыемствах Гомеля.

У канцы лістапада 1941 г. група Цімафея Барадзіна знішчыла майстэрню па рамонце танкаў. Неўзабаве была праведзена аперацыя па падрыву склада з палівам. Позняй восенню 1941 г. падпольшчыкі зрабілі выключную па сваёй дзёрзкасці аперацыю: узарвалі рэстаран, які наведвалі нямецкія афіцэры і буйныя чыны акупацыйнай адміністрацыі. Вясной 1942 г. удзельнікі падполля рыхтавалі выбух на гарадской электрастанцыі, які не ўдалося здзейсніць: у пачатку мая 1942 г. Цімафей Барадзін і шэраг яго таварышаў былі арыштаваны і пасля допытаў расстраляны.

Указам Прэзідыума Вярхоўнага Савета СССР ад 8 мая 1965 г. за асаблівыя заслугі, мужнасць і гераізм, праяўленыя ў барацьбе супраць нямецка-фашысцкіх захопнікаў, Цімафею Сцяпанавічу Барадзіну было прысвоена званне Героя Савецкага Саюза.

Помнік герою ўсталяваны ў парку Гомеля, мемарыяльныя дошкі ў гонар Цімафея Барадзіна знаходзяцца на будынках былой друкарні і фабрыкі “Палесдрук”. Адна з вуліц абласнога цэнтра носіць яго імя.

Матэрыял падрыхтаваны ў 2020 г. на аснове даведкі, размешчанай на сайце інтэрнэт-праекта “Герои страны”.