Коласаўскі мемарыяльны заказнік быў створаны ў Стаўбцоўскім раёне Мінскай вобласці ў 1972 г. Мэтай заснавання стала зберажэнне ў прыродным стане мясцін, звязаных з жыццём і творчасцю народнага паэта Беларусі Я. Коласа.

Плошча ахоўнай тэрыторыі, размешчанай на тэрыторыі Акінчыцкага лясніцтва, складае 269 га. Яна ўключае сядзібы Смольня, Акінчыцы, Альбуць і Ласток, якія адначасова з’яўляюцца філіяламі Дзяржаўнага літаратурна-мемарыяльнага музея Якуба Коласа. У гэтых мясцінах праходзілі пэўныя перыяды жыцця паэта: нарадзіўся ён у Акінчыцах, у Ластку правёў ранняе дзяцінства, у Альбуці прайшлі дзіцячыя і юнацкія гады, у Смольні з 1912 г. пастаянна жыла сям’я паэта. У Смольні ля хаты растуць ліпы, пасаджаныя самім Я. Коласам.

Акружаныя хваёвымі лясамі і шырокімі лугамі, гэтыя маляўнічыя мясціны зрабілі выключны ўплыў на фарміраванне ў будучага паэта любові да родняй зямлі і прыроды. У 1990 г. на тэрыторыі заказніка быў адкрыты мастацка-мемарыяльны комплекс “Шлях Коласа”, які складаецца з больш чым 40 драўляных скульптурных кампазіцый па матывах твораў паэта.

Матэрыял падрыхтаваны ў 2023 г.