Гісторыя Магілёўскага дзяржаўнага музычнага каледжа імя М.А. Рымскага-Корсакава пачынаецца ў 1919 г. У гэты час была створана дзіцячая музычная школа, на базе якой у 1937 г. пачало працаваць музычнае вучылішча (у 2009 г. перайменавана ў каледж).

З першых гадоў існавання каледж стаў цэнтрам прафесійнай падрыхтоўкі музыкантаў. Установа актыўна ўдзельнічае ў міжнародных і рэспубліканскіх конкурсах, аглядах педагагічнага майстэрства, метадычных і творчых работах выкладчыкаў, мае цесныя сувязі з Беларускай дзяржаўнай акадэміяй музыкі.

Каледж прымае асоб з агульнай базавай, сярэдняй і пачатковай музычнай адукацыяй на дзённае навучанне па спецыяльнасцях «Дырыжыраванне» (аркестравае, харавое), «Інструментальнае выканальніцтва», «Музыказнаўства» і рыхтуе музыкантаў, педагогаў для сярэдніх агульнадукацыйных школ, дзіцячых дашкольных устаноў.

За гады існавання Магілёўскі дзяржаўны музычны каледж стаў адной з лепшых музычных навучальных устаноў рэспублікі. Якасць навучання, узровень прафесійнай падрыхтоўкі навучэнцаў неаднаразова адзначаліся журы на рэспубліканскіх і міжнародных конкурсах, фестывалях, аглядах і алімпіядах. Выдатную рэпутацыю і вялікую вядомасць маюць аркестравыя і харавыя калектывы каледжа, майстэрства якіх вядома не толькі ў вобласці, але і далёка за яе межамі. Варта адзначыць, што амаль усе калектывы носяць ганаровае званне «Народны» і з'яўляюцца лаўрэатамі рэспубліканскіх і міжнародных конкурсаў і фестываляў.

Магілёўскі дзяржаўны музычны каледж – адна з цэнтральных канцэртных пляцовак горада: у ім праходзяць выступленні вядомых выканаўцаў і музычных калектываў, адбываюцца творчыя сустрэчы з кампазітарамі і вядомымі дзеячамі культуры. Неаднаразова ў канцэртнай зале каледжа адбываліся канцэрты Дзяржаўнага акадэмічнага сімфанічнага аркестра Рэспублікі Беларусь, Нацыянальнага акадэмічнага народнага аркестра Рэспублікі Беларусь імя І.І. Жыновіча, Дзяржаўнай акадэмічнай харавой капэлы Рэспублікі Беларусь імя Р.Р. Шырмы, Акадэмічнага хору Беларускага тэлебачання і радыё. Каледж ганарыцца тым, што на яго сцэне выступалі С. Рыхтэр, З. Далуханава, Б. Штокалаў, В. Траццякоў, У. Крайнеў, У. Співакоў, М. Плятнёў і інш. У розныя гады тут вучыліся лаўрэат міжнародных конкурсаў і Усесаюзнага конкурсу артыстаў эстрады М. Марэцкі, дырыжоры А. Сасноўскі, П. Вандзілоўскі, заслужаны артыст Рэспублікі Беларусь У. Ермалаеў. Выпускнікамі вучылішча з’яўляюцца П. Дружына, С. Лясун, В. Мазур, Р. Раінчык, І. Абалян і інш.

Матэрыял падрыхтаваны Магілёўскай абласной бібліяткай імя У.І. Леніна ў 2013 г.

1 ліпеня 2021 г. Магілёўскі дзяржаўны музычны каледж імя М. А. Рымскага-Корсакава быў рэарганізаваны шляхам далучэння да ўстановы адукацыі «Магілёўскі дзяржаўны каледж мастацтваў».