Біялагічны заказнік рэспубліканскага значэння “Пасынкі” быў створаны ў Мядзельскім раёне Мінскай вобласці ў 1991 г. Мэтай заснавання стала зберажэнне ўнікальнага ландшафтнага комплексу на поўдні Беларускага Паазер’я.

Плошча ахоўнай тэрыторыі на паўночным узбярэжжы возера Нарач паміж вёскамі Чарэўкі і Пасынкі складала 104 га. Рэльеф мясцовасці ў выглядзе крутых схілаў з драбналессем і сухадольнымі лугамі. У травастоі лугоў дамінуюць крынічнік шыракалісты, гарлянка жэнеўская, асака берагавая, суніцы зялёныя, трапляюцца цыбуля агародная, спаржа лекавая, крынічнік каласісты. З ахоўных відаў сустракаюцца кураслеп лясны, першацвет вясновы, сон лугавы і інш.

У 2001 г. заказнік ліквідаваны (пастанова Савета Міністраў Рэспублікі Беларусь ад 23.05.2001 г. № 745). Яго тэрыторыя ў якасці каштоўнага прыроднага комплексу ўключана ў склад Нацыянальнага парку “Нарачанскі”.

Матэрыял падрыхтаваны ў 2023 г.