Гісторыя прамысловага прадпрыемства па перапрацоўцы малака ў Высокім (Камянецкі раён Брэсцкай вобласці) пачалася ў 1938 г. калі тут быў пабудаваны акружны кааператыўны малочны завод у складзе асноўнага філіяла па вырабе смятаны і чатырох маслабоен. Пасля Вялікай Айчыннай вайны вытворчасць аднавілася, стала актыўна пашырацца. У гэты перыяд прадпрыемства перапрацоўвала каля 1 тыс. т малака штогод, выпускала чатыры віды масла, цвёрды сыр, казеін, марожанае, пітное малако, нарыхтоўвала масла-сырэц, шпік, сала. У наступныя гады Высокаўскі масласырзавод завёў уласную падсобную гаспадарку і сельскагаспадарчыя ўгоддзі, наладзіў выпуск 50 т масла і 60 т сыру штогод, асвоіў выпуск дыетычнага і клінковага сыроў, брынзы, вяршкоў. Сыр “Пашахонскі” вытворчсці завода атрымаў вышэйшую ўзнагароду СССР “Дзяржаўны знак якасці”.

У 1990-я гг. прадпрыемства акцыянавана. На працягу многіх гадоў на ім праводзілася паступовая рэканструкцыя і мадэрнізацыя вытворчасці, быў арганізаваны ўласны гандаль. У 2003 г. на базе Высокаўскага сыраробнага завода створана сумеснае беларуска-расійскае адкрытае акцыянернае таварыства “Белавежскія сыры”. Гэта рэарганізацыя дазволіла значна павялічыць магутнасці па перапрацоўцы і аб’ёмы вытворчасці. У цяперашні час ААТ “Белавежскія сыры” – сучаснае высокатэхналагічнае прадпрыемства ў складзе холдынга “Канцэрн Брэстмясамалпрам”. Яно выпускае сычужныя сыры рознай тлустасці, смакавых якасцей і тэрмінаў паспявання, сметанковае і топленае масла. Прадукцыя з’яўляецца шматразовым пераможцам конкурсаў “Прадукт года”, “Чэмпіён смаку”. Кампанія стала лаўрэатам Прэміі Урада Рэспублікі Беларусь за дасягненні ў галіне якасці (2006).

Матэрыял падрыхтаваны ў 2024 г.