У цэнтры Мінска, недалёка ад Плошчы Перамогі знаходзіцца Мінскі парк імя Янкі Купалы. Закладзены ў 1949 г. як парк імя 30-годдзя БССР. Архітэктар праекта – І. Рудэнка. Размешчаны каля перасячэння вуліц Янкі Купалы і праспекта Незалежнасці, на правым беразе р. Свіслач. Да гэтага на гэтым месцы стаялі адна- і двухпавярховыя дамы. Асноўная частка парку была заснавана ў 1950 г. Галоўная алея размешчана па дыяганалі ад праспекта Незалежнасці, дзе знаходзіцца галоўны ўваход у парк, да выгібу ракі. На скрыжаванні галоўнай і цэнтральнай алей, у цэнтры размяшчаўся фантан. У 1959 г. на тэрыторыі парку пабудавалі літаратурны музей Я. Купалы. Ён знаходзіцца на месцы, дзе раней быў дом, у якім жыў паэт у 1927–1941 гг. Сама пабудова згарэла ў час Вялікай Айчыннай вайны. З 1962 г. парк мае сучасную назву. У 1972 г. у пачатку галоўнай алеі ўстаноўлены помнік Я. Купалу (скульптары А. Анікейчык, Л. Гумілеўскі, А. Заспіцкі, архітэктары Ю. Градаў, Л. Левін). Быў перабудаваны і фантан са скульптурнай групай па матывах твораў паэта. Кампазіцыя адлюстроўвае адзін з момантаў старажытнага народнага свята «Купалле» – пусканне вянкоў у ваду, таму так і называецца «Вянок».

Сёння парк з'яўляецца часткай водна-зялёнага дыяметра Мінска. У архітэктурна-планіровачным вырашэнні ўдала спалучаюцца рэгулярны і пейзажны стылі. Мае плошчу 7,9 га. Зялёныя насаджэнні прадстаўлены ліставымі і хвойнымі дрэвамі, кустамі мясцовых і інтрадуцыраваных парод (ліпа драбналістая, клён вастралісты, дуб чарэшчаты, елка калючая, розныя віды піхт, туя заходняя і інш.). Радавыя пасадкі дрэў уздоўж дарожак ствараюць цяністыя алеі. Жывапісныя групы, масівы з арэха маньчжурскага, елкі блакітнай фарміруюць пейзажную частку парку. Цэнтр ландшафтна-паркавай кампазіцыі – помнік народнаму паэту Беларусі і фантан. У 2013 г. завершана другая рэканструкцыя цэнтральнай часткі, зроблена веладарожка, якая злучаецца з веладарожкай дзіцячага парку імя М. Горкага. Парк – месца культуры і адпачынку не толькі мінчан, але і гасцей горада.

Матэрыял падрыхтаваны ў 2019 г.