Краткая справка:
работнік Беларускай чыгункі (машыніст-інструктар лакаматыва), Герой Сацыялістычнай Працы (1971), удзельнік партызанскага руху ў гады Вялікай Айчыннай вайны, узнагароджаны ордэнамі Леніна, «Знак Пашаны», Айчыннай вайны ІІ ступені
Имена на других языках:
Деменков Виктор Андреевич (русский);
2362 символа
Справка
Віктар Андрэевіч Дземянкоў нарадзіўся ў Магілёве, скончыў шэсць класаў гарадской сярэдняй школы. З ліпеня 1941 г. разам з бацькамі знаходзіўся на акупіраванай нямецкімі войскамі тэрыторыі, удзельнічаў у партызанскім руху. Пасля аб’яднання партызан з перадавымі часткамі Чырвонай Арміі ўлетку 1944 г. Віктар Дземянкоў стаў вучнем слесара, а затым слесарам паравознага дэпо, качагарам паравоза Магілёўскага аддзялення Беларускай чыгункі. У 1950 г. В.А. Дземянкоў стаў памочнікам машыніста, скончыў курсы машыністаў, навучыўся майстэрству кіравання і ў дасканаласці авалодаў прафесіяй машыніста. За поспехі, дасягнутыя ў выкананні заданняў шостага пяцігадовага плана перавозак (1956–1960), В.А. Дземянкоў быў узнагароджаны ордэнам «Знак Пашаны».
З 1965 г. стаў працаваць машыністам-інструктарам на цеплавозе-лакаматыве са значна большай грузападымальнасцю і магутнасцю рухавіка. Дасканала ведаючы рэльеф дарогі, перадавы машыніст ужываў найбольш аптымальныя рэжымы кіравання і з кожнай паездкай павялічваў вагу цягніка. З цягам часу Віктар Дземянкоў дасягнуў высокіх паказчыкаў па эканоміі паліва і выкананні графіка ваджэння цягнікоў, сістэматычна перавыконваў планавыя заданні па грузаперавозках на працягу шэрага пяцігодак.
Указам Прэзідыума Вярхоўнага Савета ад 4 мая 1971 г. за выдатныя поспехі ў выкананні заданняў пяцігадовага плана перавозак і павышэнні эфектыўнасці выкарыстання тэхнічных сродкаў чыгуначнага транспарту Віктару Андрэевічу Дземянкову было прысвоена званне Героя Сацыялістычнай Працы з уручэннем ордэна Леніна і залатога медаля «Серп і Молат».
Па выніках восьмай пяцігодкі лакаматыўная брыгада пад кіраўніцтвам В.А. Дземянкова стала лепшай у Магілёўскім аддзяленні Беларускай чыгункі і працягвала гэтак жа ударна працаваць у перыяд новых пяцігодак. Віктар Дземянкоў падрыхтаваў некалькі дзясяткаў кваліфікаваных машыністаў, унёс значны ўклад у павышэнне тэхналагічнай дысцыпліны, прымаў актыўны ўдзел у грамадска-палітычным жыцці краіны, выбіраўся дэпутатам Вярхоўнага Савета Беларускай ССР (1971–1975), Магілёўскага абласнога Савета дэпутатаў працоўных.
Узнагароджаны ордэнамі Леніна (04.05.1971), Айчыннай вайны ІІ-й ступені (11.03.1985), «Знак Пашаны» (01.08.1959), медалямі, ганаровымі граматамі, нагруднымі знакамі «Выдатны паравознік», «Ганароваму чыгуначніку» (1971).
Пераклад 2021 г. матэрыялаў інтэрнэт-праекта «Герои страны».
