Мінскі камбінат сілікатных вырабаў вядзе сваю гісторыю з 1895 г., калі прадпрымальніку Г. А. Каплану выдалі дазвол на будаўніцтва ў Мінску новага прадпрыемства па выпуску чырвонай глінянай цэглы. У той час гэта была найбуйнейшая цагельная вытворчасць з кальцавой печчу Гофмана і стужачным прэсам, што адпавядала лепшым сусветным дасягненням. У 1917 г. сезонны цагельны завод Каплана перайменавалі ў Цагельны завод № 1. Пасля перапынку ў працы ў Вялікую Айчынную вайну прадпрыемства аднавіла дзейнасць у кастрычніку 1944 г. У наступныя гады праведзена мадэрнізацыя вытворчасці: пабудаваны аўтаклаўны цэх па выпуску буйнагабарытных сілікатных блокаў і сілікатнай цэглы, цэх гіпсабетонных перагародачных панэлей, цэх па вытворчасці полістырольнай абліцовачнай пліткі, масцікі і цеплаізаляцыйных пліт з пенаполістыролу, аглапарытавы цэх. У сувязі са змяненнем наменклатуры прадукцыі прадпрыемства было перайменавана ў Мінскі камбінат буйнаблочных будаўнічых канструкцый (1959), Мінскі камбінат сілікатных вырабаў (1971).

З пераходам да рыначных адносін прадпрыемства ў 1992 г. пераўтворана ў адкрытае акцыянернае таварыства. Паступова мяняўся асартымент прадукцыі: быў арганізаваны ўчастак па выпуску бетонных і жалезабетонных вырабаў (падмуркавых блокаў, заборных панэлей, тратуарнай пліткі і бардзюрнага каменю), наладжана вытворчасць вырабаў з полістыролу для ўпакоўкі халадзільнікаў і маразільнікаў ЗАТ «Атлант» і інш. У 2016 г. Мінскі камбінат сілікатных вырабаў пераўтвораны ў філіял № 3 адкрытага акцыянернага таварыства "Беларускі цэментны завод". У асартыменце прадукцыі, якая выпускаецца, каля 100 найменняў: сілікатная цэгла, блокі і перамычкі з ячэістага бетону, пенаполістырольныя цеплаізаляцыйныя пліты, полістыролбетон, тратуарная плітка, бардзюрныя бетонныя камяні і інш.

Матэрыял падрыхтаваны ў 2024 г.