Адным з буйнейшых вытворцаў жаночай бялізны на рынку Беларусі і краін СНД з’яўляецца прадпрыемства “Мілавіца”.

Яго гісторыя пачалася ў 1908 г., калі прадпрымальнікі з Францыі браты Жан і Франсуа-Віктар Турнье ўпершыню ў Расійскай імперыі адкрылі ў Мінску фабрыку галантарэйных тавараў. Выпускаліся тут гузікі, мужчынскія і жаночыя грабяні. Вытворчасць была абсталявана дынама-машынай для вырабу электрычнасці і рухавіком магутнасцю ў 60 конскіх сіл. Перад пачаткам Першай сусветнай вайны абсталяванне фабрыкі і большую частку яе рабочых эвакуіравалі, пасля рэвалюцыі 1917 г. прадпрыемства нацыяналізавалі. У 1925 г. па ініцыятыве былых работнікаў на чале з С. А. Раманоўскім галантарэйная фабрыка "Франсуа Турнье" была пераўтворана ў арцель “Спартак”, у 1929 г. уключана ў склад новай дзяржаўнай галантарэйнай фабрыкі “Беларуска”. У гады Вялікай Айчыннай вайны прадпрыемства разбурана.

У пасляваенны перыяд фабрыка была адноўлена, яе асартымент пашырыўся сумкамі з заменніка скуры, гумавымі плашчамі і інш. З 1964 г. спецыялізацыяй стаў выпуск гарсэтных вырабаў. У 1970–1990-х гг. прадпрыемства ўваходзіла ў склад вытворчага швейнага аб’яднання “Камсамолка” і акрамя бюстгалтараў выпускала паясы, гальштукі, вырабы для немаўлят, дзяцей ясельнага і школьнага ўзросту. У 1991 г. фабрыцы прысвоена назва “Мілавіца”, у 2000 г. яна пераўтворана ў сумеснае прадпрыемства, у складзе акцыянераў якога італьянская кампанія "Iluna Group Spa”,”Silvano Investment Group” і інш.

У цяперашні час сумеснае прадпрыемства закрытае акцыянернае таварыства “Мілавіца” ўваходзіць у склад канцэрна “Беллегпрам”. Тут працуюць каля 2 тыс. чалавек. На прадпрыемстве праведзена технічнае пераўзбраенне: розныя этапы вытворчага працэсу абслугоўваюцца машынамі сусветна вядомых марак, для раскрою матэрыялаў выкарыстоўваюцца сучасныя аўтаматызаваныя канвеерныя раскройныя комплексы. Усё гэта дазволіла значна павысіць прадукцыйнасць працы і палепшыць якасць крою. Цяпер прадпрыемства прапануе шырокі выбар жаночай сподняй бялізны, купальных касцюмаў, начных кашуль, а таксама створаную спецыяльна для мужчын калекцыю вырабаў “Hidalgo”.

Сучасныя падыходы ў мадэліраванні бялізны, выкарыстанне крэатыўных дызайнерскіх рашэнняў і актуальных палотнаў, высокая якасць прадукцыі спрыяюць прызнанню гандлёвай маркі “Мілавіца” па ўсім свеце. Прадпрыемства неаднаразова ўзнагароджвалася дыпломамі конкурсаў “Брэнд года”, “Лепшы экспарцёр”, “100 лепшых тавараў Расіі”, стала лаўрэатам прэміі Прэміі Урада Рэспублікі Беларусь за дасягненні ў галіне якасці (1999, 2002, 2010, 2015, 2018).

Матэрыял падрыхтаваны ў 2024 г.