«Холдынгавая кампанія “Пінскдрэў”» заснавана ў 1880 г. аўстра-венгерскімі капіталістамі братамі Лур’е як фабрыка па вырабе сапожных шпілек, фанеры і фанерных скрынь. Але паколькі значнага прыбытку не прыносіла, у 1892 г. пераабсталявана для вытворчасці запалак. У 1923 г. у Пінску пабудаваны лесапільны завод кампаніі «Пупко і сын», а ў 1930 г. у в. Гарадзішча была адкрыта фанерная фабрыка.

У час Вялікай Айчыннай вайны прадпрыемства панесла значныя страты, але ўжо ў 1944 г. актыўна працавала і выпускала тапчаны, лаўкі, сталы і г.д. У 1950-я гг. адбылася яго рэканструкцыя, укаранёны перадавыя тэхналогіі. Гэты перыяд аказаўся вельмі важным для станаўлення і развіцця фабрыкі. У 1959 г. былі аб’яднаны Пінская запалкавая і Гарадзішчанская фанерная фабрыкі ў фанерна-запалкавы камбінат. Тады ж стаў дзейнічаць мэблевы цэх па вырабе крэсел, падкветнікаў і табурэтаў. У 1965 г. пачаўся выпуск школьных парт, адкрыты цэхі драўнінна-стружкавых пліт і карбамідных смол. У 1971 г. на базе камбіната было створана вытворчае дрэваапрацоўчае аб’яднанне «Пінскдрэў». У 1980-х гг. адбылося яго тэхнічнае перааснашчэнне, што садзейнічала росту вытворчасці прадукцыі. У 1991 г. прадпрыемства перайшло на арэндную форму гаспадарання, а ў 1992 г. стала калектыўным аб’яднаннем, у 2000 г. пераўтворана ў закрытае акцыянернае таварыства «Пінскдрэў» і ўвайшло ў склад канцэрна «Беллеспаперапрам».

У цяперашні час закрытае акцыянернае таварыства «Холдынгавая кампанія “Пінскдрэў”» – вядучая дрэваапрацоўчая кампанія ў Рэспубліцы Беларусь. Яна выпускае мягкую і корпусную мэблю, фанеру, запалкі, шпон, піла- і лесаматэрыялы, мэблевыя шчыты, матрацы, вокны і дзверы ПВХ і экспартуе іх у больш чым 130 краін свету. Прадпрыемства з’яўляецца пераможцам конкурсаў «Брэнд года», «Народная марка», «Лепшыя тавары Рэспублікі Беларусь», «Выбар года» і іншых, лаўрэатам Прэміі Урада Рэспублікі Беларусь за дасягненні ў галіне якасці (2004).

Матэрыял падрыхтаваны ў 2020 г., актуалізаваны ў 2024 г.