Бабруйскі завод трактарных дэталяў і агрэгатаў заснаваны ў 1945 г. на базе міжраённай майстэрні капітальнага рамонту. Майстэрня займалася рамонтам трактарных матораў, вырабам і рэгістрацыяй запасных частак да трактароў і іншых сельскагаспадарчых машын. У ліпені 1958 г. быў створаны Бабруйскі рамонтны завод, які спецыялізаваўся на рамонце малатанажных грузавых машын і рухавікоў да трактароў. У канцы 1959 г. Бабруйскі рамонтны завод быў ператвораны ў Бабруйскі завод аўтатрактарных дэталяў. Разам з назвай змянілася і спецыялізацыя прадпрыемства, якая заключалася ў выпуску запасных частак да аўтамабіляў і трактароў. Завод паступова расшыраўся, перад ім ставіліся ўсе больш высокія планавыя паказчыкі. У 1960-я гг. ішла актыўная кааперацыя з Мінскім трактарным заводам, і 30 кастрычніка 1974 г. ён увайшоў у склад вытворчага аб'яднання «Мінскі трактарны завод». Пашырыўся асартымент выпускаемай прадукцыі. У 1979 г. прадпрыемства стала называцца “Бабруйскі завод трактарных дэталяў і агрэгатаў”. У 1989 г. завод заняў другое месца сярод прадпрыемстваў-філіялаў вытворчага аб’яднання «Мінскі трактарны завод». Яго вытворчыя і планавыя паказчыкі пастаянна раслі, а прадукцыя адрознівалася высокай якасцю. Вялікае значэнне ўдзялялася мадэрнізацыі вытворчасці, перападрыхтоўцы кадраў, рацыяналізацыі. 1990-я гг. адзначыліся спадам вытворчасці прадукцыі і нізкім попытам на яе, але, дзякуючы плённай працы калектыву, ужо ў 1994 г. гадавы план быў выкананы больш чым на сто працэнтаў.

Сёння адкрытае акцыянернае таварыства «Бабруйскі завод трактарных дэталяў і агрэгатаў» − сучаснае індустрыяльнае прадпрыемства у складзе холдынга «МТЗ-Холдынг», адзін з лідараў беларускага сельскагаспадарчага машынабудавання. Асноўная яго прадукцыя – малагабарытны трактар «Беларус» розных мадыфікацый, навясное і прычапное абсталяванне, запасныя часткі і камплектуючыя да яго (снегаачышчальнікі, лесапажарныя модулі, паркавыя пыласосы, малагабарытныя паўпрычэпы, трактарныя экскаватары, касілкі, бароны, культыватары, акучнікі, фрэзы, плугі, апырсквальнікі, палівальныя машыны і іншае). Прадукцыя прадпрыемства экспартуецца ў Расію, Украіну, Польшчу, Венгрыю, Германію, Балгарыю, Казахстан. Прадпрыемства з’яўляецца пераможцамі конкурса «Лепшыя тавары Рэспублікі Беларусь» (2017, 2019), лаўрэатам прэміі Урада Рэспублікі Беларусь за дасягненні ў галіне якасці (2017, 2020).

Матэрыял падрыхтаваны ў 2020 г., актуалізаваны ў 2024 г.