Біялагічны заказнік рэспубліканскага значэння “Сапоцкінскі” быў заснаваны на тэрыторыі Аўгустоўскага і Сапоцкінскага лясніцтваў (Гродзенскі раён) у 1978 г. Мэтай стварэння стала ахова прыродных запасаў лекавых раслін, ландшафтных і фларыстычных комплексаў з рэдкімі і знікаючымі відамі.

Большая частка тэрыторыі плошчай 12,6 тыс. га пакрыта лясамі, пераважна імшыстымі, верасовымі, бруснічнымі і чарнічнымі хвойнікамі. Радзей трапляліся ельнікі, бярэзнікі і чорнаалешнікі. Сярод рэдкіх ландшафтных прыродных комплексаў – стужачныя ліпнякі, поймавыя дубровы і грабнякі. Меліся значныя запасы лекавых раслін: талакнянкі, брусніц, ядлоўцу, цмену пясчанага, ландыша майскага. Былі зафіксаваны месцы росту рэдкіх відаў, занесеных у Чырвоную кнігу Рэспублікі Беларусь: купальніку горнага, баранцу звычайнага, сіелы прамой, кураслепу звычайнага і інш. З прадстаўнікоў ахоўнай фаўны сустракаліся барсук, вялікі бугай, чорны бусел, аляпка, варакушка, махаон, блакітная ордэнская стужка, чмель Шрэнка.

Заказнік быў ліквідаваны ў 2007 г. (пастанова Савета Міністраў Рэспублікі Беларусь ад 27.12.2007 г. № 1833). Яго тэрыторыя ўключана ў склад рэспубліканскага ландшафтнага заказніка “Гродзенская пушча”.

Матэрыял падрыхтаваны ў 2023 г.