Ландшафтны заказнік рэспубліканскага значэння “Гродзенская пушча” быў створаны ў Гродзенскім раёне ў 2007 г. на тэрыторыі дзяржаўных батанічных заказнікаў дзікарослых лекавых раслін ”Гожаўскі” і “Сапоцкінскі”, якія існавалі тут раней. Мэтай заснавання стала зберажэнне ў прыродным стане каштоўных прыродных ландшафтаў, лясных і лугавых экалагічных сістэм, рэдкіх відаў жывёл і раслін. Заказнік мае міжнародны статус ключавой батанічнай тэрыторыі.

Ахоўная тэрыторыя плошчай 20,4 тыс. га з’яўляецца часткай буйнога ляснога масіву на мяжы Беларусі, Літвы і Польшчы. Рэльеф уяўляе сабой хвалістую водна-ледавіковую раўніну з невялікімі вярховымі і пераходнымі балотамі. Гідраграфічная сетка прадстаўлена рэкамі Нёман, Чорная Ганча, Марыха, Шляміца, азёрамі і крыніцамі. На паўднёвай мяжы заказніка знаходзіцца Аўгустоўскі канал – гідратэхнічнае збудаванне першай паловы ХІХ ст. Большая частка прыроднага комплексу ўкрыта лесам з хвоі. Зрэдку трапляюцца ўчасткі з бярозай, елкай, асінай. Асаблівую каштоўнасць уяўляюць высокаўзроставыя ліпавыя, дубовыя і ясеневыя лясы. У флоры зарэгістраваны 801 від сасудзістых раслін, з якіх баранец звычайны, кураслеп лясны, шпажнік чарапіцавы, лілея кучаравістая, гарычка крыжападобная, тайнік яйцападобны ўнесены ў Чырвоную кнігу Рэспублікі Беларусь. Жывёльны свет налічвае больш за 200 відаў наземных пазваночных. Сустракаюцца рэдкія для Беларусі барсук, рысь, звычайны зімародак, скапа, трохпальцы дзяцел, белая чапля, ручаёвая стронга, еўрапейскі харыус, чаротавая рапуха, грабеньчаты трытон і інш.

Заказнік з’яўляецца аб’ектам экалагічнага турызму. Для наведвальнікаў абсталявана некалькі экалагічных сцежак, пракладзены пешыя, веласіпедныя і водныя маршруты. У наваколллі прыроднага комплексу шмат помнікаў гісторыі і архітэктуры. У вызначаны тэрмін у заказніку дазволена паляванне і рыбалка.

Матэрыял падрыхтаваны ў 2023 г.