У цэнтральнай частцы аграгарадка Лыскава Пружанскага раёна Брэсцкай вобласці знаходзіцца невялікі драўляны храм у гонар Раства Прасвятой Багародзіцы. Знаўцы архітэктуры адзначаюць, што ў яго абліччы прысутнічаюць рысы, характэрныя для стылю мадэрн, а таксама культавай архітэктуры Закарпацця.

Згодна з крыніцамі, праваслаўная царква ў мястэчку існавала здаўна, аднак яе разабралі ў канцы ХІХ ст. Некаторы час праваслаўныя вернікі выкарыстоўвалі для набажэнстваў былы рымска-каталіцкі касцёл і капліцу на могілках. У пачатку 1930-х гг. на месцы папярэдняга храма ўзведзены новы.

Царква ў гонар Раства Прасвятой Багародзіцы асвечана ў 1933 г. Будынак уяўляў сабой кубічны зруб з сасновага бруса, да якога з захаду прымыкала трох’ярусная званіца, а з усходу – прамавугольная апсіда з бакавымі рызніцамі. Асноўны аб’ём накрыты вальмавым дахам, у які ўрэзаны магутны васьмігранны светлавы барабан з цыбулепадобным купалам і ліхтаром з макаўкай. Аконныя праёмы – ромбападобныя ў барабане і стральчатыя ў асноўным аб’ёме, у прытворы і рызніцы – у зубчастых ліштвах. У інтэр’ер залы адкрыты барабан, які трымаецца чатырма слупамі з ветразевай канструкцыяй. Хоры размешчаны на сценах бакавых прытвораў. Алтарная частка з рызніцай аддзелена высокім разьбяным іканастасам на ўсю вышыню храма. Тут захоўваецца абраз “Маці Божая Адзігітрыя” (XVIII ст.).

Царква ў гонар Раства Прасвятой Багародзіцы працягвала дзейнічаць і ў савецкі час. Цяпер яна ўнесена ў Дзяржаўны спіс гісторыка-культурных каштоўнасцей Рэспублікі Беларусь і ахоўваецца дзяржавай.

Матэрыял падрыхтаваны ў 2022 г.