Галіна Мікалаеўна Алейнік нарадзілася ў Барысаве ў сям’і служачых. Пасля заканчэння школы паступіла ў Мінскі дзяржаўны педагагічны інстытут імя А.М. Горкага (цяпер – Беларускі дзяржаўны педагагічны ўніверсітэт імя М. Танка), дзе атрымала дыплом бібліятэкара-бібліёграфа. З 1963 г. Г.М. Алейнік пачала свой прафесійны шлях: загадвала чытальнымі заламі Падсвільскай гарпасялковай бібліятэкі, гарадской бібліятэкі “Юнацтва” ў Мінску, працавала бібліятэкарам у аддзеле навукова-тэхнічнай інфармацыі спецыяльнага канструктарскага бюро № 3 Міністэрства аўтамабільнай прамысловасці, навукова-тэхнічнай бібліятэцы Беларускага навукова-даследчага інстытута навукова-тэхнічнай інфармацыі і тэхніка-эканамічных даследаванняў Дзяржплана БССР (цяпер Рэспубліканская навукова-тэхнічная бібліятэка).
У 1977 г. Г.М. Алейнік стала супрацоўнікам Дзяржаўнай бібліятэкі БССР імя У.І. Леніна (цяпер Нацыянальная бібліятэка Беларусі). На працягу трох гадоў яна з’яўлялася галоўным бібліятэкарам аддзела камплектавання, потым узначаліла гэты аддзел. Пад кіраўніцтвам Г.М. Алейнік праходзіла распрацоўка і ўкараненне “Адзінага профілю камплектавання асноўнага і падсобнага фондаў дзяржаўнай бібліятэкі БССР”, праца над “Зводным профілем камплектавання навуковых бібліятэк г. Мінска”. Галіна Мікалаеўна займалася навукова-даследчай работай па вывучэнні фондаў публічных бібліятэк рэспублікі, аказвала метадычную і практычную дапамогу бібліятэкарам, дзялілася вопытам на канферэнцыях і семінарах, распрацавала і ўнесла шэраг прапаноў па ўдасканаленні тэхналагічных працэсаў і павышэнні прадукцыйнасці працы.
Прафесійныя дасягненні Г.М. Алейнік не маглі застацца незаўважанымі: у 1986 г. яе прызначылі на пасаду намесніка дырэктара па бібліятэчнай рабоце, а 6 сакавіка 1990 г. яна ўзначаліла галоўную бібліятэку краіны. Ва ўмовах сацыяльна-эканамічных рэформ Галіна Мікалаеўна ўдала вызначала перспектывы развіцця не толькі Нацыянальнай бібліятэкі Беларусі, але і бібліятэк галіны, умела выкарыстоўвала ў практычнай дзейнасці асновы тэорыі і практыкі кіравання, айчынны і замежны вопыт.
Галіна Мікалаеўна Алейнік з’яўляецца адным з распрацоўшчыкаў Закона “Аб бібліятэчнай справе ў Рэспубліцы Беларусь” і шэрага іншых нарматыўна-рэгламентуючых дакументаў, арганізатарам міжнародных і рэспубліканскіх канферэнцый па асноўных пытаннях бібліятэчнай справы.
Супрацоўнікі бібліятэкі, якім пашчасціла працаваць пад кіраўніцтвам Галіны Мікалаеўны, узгадваюць яе як творчага чалавека, які валодае выдатнымі арганізатарскімі здольнасцямі, уменнем прагназаваць вынікі і забяспечваць іх рэалізацыю, настойлівасцю ў вырашэнні вытворчых задач.
Прафесійныя і творчыя поспехі Галіны Мікалаеўны Алейнік былі адзначаны ганаровымі граматамі Міністэрства культуры СССР і адміністрацыі Ленінскага раёна г. Мінска. У 1997 г. ёй было прысвоена ганаровае званне заслужанага дзеяча культуры Рэспублікі Беларусь.
Матэрыял падрыхтаваны ў 2022 г.
